नयाँ कर कटौतीको साथ स्मार्टफोनको मूल्य १५ प्रतिशतले घटाउने भारतको लक्ष्य

काठमाडौं ।

भारतका अर्थमन्त्रीले नयाँ कर कटौती लागू गरेसँगै स्थानीय ग्राहकका लागि मेड इन इन्डिया स्मार्टफोनहरू १५ प्रतिशतले सस्तो हुने भएको छ।

सन् २०२४ को केन्द्रीय बजेटले डिभाइसहरूलाई अझ किफायती बनाउन र भारतमा मोबाइल उद्योगलाई बढावा दिनको लागि स्मार्टफोन कम्पोनेन्टहरूमा आधारभूत भन्सार शुल्क १५ प्रतिशतले घटाएको बताईएको छ।

यो कटौती केवल पार्टपुर्जाहरूमा लागू हुन्छ र भारतमा एसेम्बल भएका फोनहरू मात्र परिवर्तनबाट प्रभावित हुनेछन्।

विश्लेषकहरूका अनुसार यस कदमले स्थानीय एसेम्बललाई बढावा दिने र विश्वव्यापी लगानी आकर्षित गर्ने अपेक्षा गरिएको छ। यसले विश्वव्यापी स्मार्टफोन उत्पादन केन्द्रको रूपमा भारतको स्थितिलाई बलियो बनाउनुका साथै विशेष गरी २५,००० भारतीय रुपैयाँ (३०० अमेरिकी डलर भन्दा कम) मुनिको स्मार्टफोन बिक्रीमा ठूलो सुधार ल्याउन सक्ने जनाइएको छ।

“मेक इन इन्डिया” पहल लगभग १० वर्ष पहिले मोदी प्रशासनले भारतीय जनसंख्याद्वारा स्मार्ट टेक्नोलोजीको डिजिटलाईजेसन र कार्यान्वयनलाई बढावा दिनको लागी शुरू गरेको थियो।

यस अभियानको भागको रूपमा निर्मित केही लोकप्रिय फोनहरूमा वानप्लस नोर्ड ४, सामसङ ग्यालेक्सी एम३५ र शाओमी रेडमी १३ फाइभजी रहेका छन्।

एप्पलले पनि भारतमा आफ्नो आईफोन १५ इकाइहरू निर्माण गर्ने गरेको छ। यद्यपि यो सरकारी अभियानको हिस्सा भने नभएको जीएसएमएरिनाले उल्लेख गरेको छ।