क्राउडस्ट्राइक अपडेट पीडितहरुका लागि माइक्रोसफ्टले ल्यायो रिकभरी टूल

काठमाडौं ।

माइक्रोसफ्टले क्राउडस्ट्राइक आउटेजका कारण समस्या आएका विण्डोज डिभाइसहरुका लागि हालै एउटा रिकभरी टूल सार्वजनिक गरेको छ।

गत शुक्रबार अर्थात जुलाई २१ का दिन साइबर सुरक्षा सफ्टवेयर क्राउडस्ट्राइक अपडेट हुँदा विश्वभरमा ८५ लाख हाराहारी विण्डोज डिभाइसमा पुरै स्क्रीन नीलो हुने समस्या देखा परेको थियो। यसका कारण दूरसञ्चार, एयरलाइन्स, रेलवे, बैंक वित्त लगायतका सेवा अस्तव्यस्त भएका थिए ।

यो टूलका माध्यमबाट संसारभरका सूचना प्रविधिका एडमिनहरुले क्राउडस्ट्राइको गलत अपडेटबाट उत्पन्न समस्या पीडित विण्डोज डिभाइसहरु रिकभरी गर्न सक्ने प्रविधि समाचार संस्था द भर्जले जनाएको छ ।

यो टूलले ती डिभाइसहरुका बूटेबल यूएसबी ड्राइभ सिर्जना गर्दछन् र प्राविधिकहरुले त्यसैमार्फत् डिभाइसहरु मर्मतसम्भार गर्दछन्।

उता क्राउडस्ट्राइकले पनि आफ्नो गलत अपडेटका कारण संसारभर ८५ लाख हाराहारी विण्डोज डिभाइसको स्क्रीन नीलो हुने ‘ब्लू स्क्रीन अफ डेथ’ को समस्या उत्पन्न भएकाले समाधानका लागि सफ्टवेयर अपडेट गरेर उपलब्ध गराउन थालिसकेको बुझिएको छ।

यसका कारण डिभाइसहरु पटक पटक रिबूट हुने समस्यामात्र भोगेकाहरुलाई आवश्यक अपडेट उपलब्ध गराइने तर यसबाहेकका समस्या आएका डिभाइसमा भने सेफ मोडमा राखेर आफैंले रिबूट गरी समस्याग्रस्त क्राउडस्ट्राइक फाइल हटाउनुपर्ने एक मात्र विकल्प रहेको बताइएको छ।

माइक्रोसफ्टको यो रिकभरी टूलले यूएसबी मार्फत यसको विण्डोज पीई वातावरणमा बुट गरेर, प्रभावित मेसिनको डिस्कमा पहुँच पुर्याई स्वचालित रूपमा समस्याग्रस्त क्राउडस्ट्राइक फाइल मेटाएर मेसिनलाई राम्रोसँग बुट गर्न सहजता प्रदान गर्छ। यस हिसाबले अब रिबूट गर्ने प्रक्रिया पहिलेभन्दा कम म्यानुअल हुने कम्पनीले जनाएको छ।

यसबाहेक माइक्रोसफ्टले अजुर सिस्टममा चलिरहेका विण्डोज भर्चुअल उपकरणहरु रिकभरीका लागि पनि छुट्टै प्रक्रिया तयार गरेको छ। साथै आफ्नो सपोर्ट साइटमा कम्पनीले सबै विण्डोज १० र ११ डिभाइसहरुका लागि रिकभरी प्रक्रिया उपलब्ध गराएको छ।