बर्खे बिदामा कम्प्युटर कक्षा सञ्चालन

काठमाडौं ।

रामेछापको उमाकुण्ड गाउँपालिकामा रहेका माध्यमिक विद्यालयमा बर्खे बिदाको समयमा कम्प्युटर कक्षा सञ्चालन भइरहेको छ।

गाउँपालिकामा रहेका सात वटा माध्यमिक विद्यालयमा गत असार ३० गतेदेखि दैनिक तीन/तीन ओटा कम्प्युटर कक्षा सञ्चालन भइरहेको गाउँपालिकाले जनाएको छ।

माध्यमिक विद्यालयमा अध्ययनरत कक्षा ८ देखि १२ सम्मका विद्यार्थीलाई बर्खे बिदाको समयमा दुई घण्टा समयको एउटा कक्षा रहने गरी दैनिक तीन वटा कम्प्युटर कक्षा सञ्चालन भइरहेको गाउँपालिकाका शिक्षा अधिकृत ङावा शेर्पाले बताए। उनले भने, “उमाकुण्ड गाउँपालिकामा रहेका माध्यमिक विद्यालयमा अध्ययनरत कक्षा ८ देखि १२ सम्मका विद्यार्थीलाई बर्खे बिदाको समयमा लक्षित गरी १५ दिने कम्प्युटर (अफिस प्याकेज) कक्षा सञ्चालन भइरहेको छ। अहिले सात वटा माविमा दुई÷दुई घण्टा समय व्यवस्थापन गरी तीन/तीन वटा कम्प्युटर कक्षा सञ्चालन भइरहेका छन् ।”

विद्यालय बर्खे बिदा भएपछि सुरु भएको कम्प्युटर कक्षा यही साउन १२ गतेसम्म सञ्चालन हुने शिक्षा अधिकृत शेर्पाले बताए। एउटा माविमा २० वटा मात्रै कम्प्युटर रहेकाले २० जना विद्यार्थीको एउटा समूह बनाएर सबै विद्यालयमा दैनिक कक्षा सञ्चालन गरिएको उनले बताए। गोरखापत्रबाट