बेलहिया नाकामा ‘वाकथ्रु मेसिन’ जडान

काठमाडौं ।

भैरहवा जिल्लाको सीमा अपराध नियन्त्रणका लागि बेलहिया नाकामा ‘वाकथ्रु मेसिन’ जडान गरिएको छ। यो बेलहिया स्थलमार्ग हुँदै मुलुकमा सबैभन्दा बढी पर्यटक भित्रिने नाका हो।

सीमाबाट हुन सक्ने अपराधलाई नियन्त्रण गर्न जिल्ला प्रशासन कार्यालय रुपन्देहीले सिद्धार्थनगर नगरपालिकाको साढे पाँच लाख आर्थिक सहयोगमा नाकामा उक्त प्रविधि जडान गरेको हो । प्रविधि जडानले सीमाबाट हुने अपराध नियन्त्रण गर्न सकिने विश्वास लिइएको छ।

स्थलमार्गको सीमानाकामध्ये ‘वाकथ्रु मेसिन’ जडान गरिएको बेलहिया नाका सम्भवतः पहिलो हो । भारतबाट नेपाल प्रवेश गर्दा पुरानो स्वागतद्वारा बायाँतर्फ उक्त प्रविधि जडान गरिएको छ ।

सीमाबाट आवतजावत गर्ने सर्वसाधारणले अब सोही ‘वाकथ्रु मेसिन’ हुँदै सुरक्षा जाँच गराएर मात्र मुलुकमा प्रवेश पाउँछन् ।

भारततर्फ सुनौली नाकामा वर्षौंअघि ‘वाकथ्रु मेसिन’ जडान गरेर सोही वाकथ्रु हुँदै परिचयपत्र हेरेर र आवश्यक परे यात्राको विवरण टिपोट गरेर मात्र भारतमा प्रवेश दिने गरिएको छ तर नेपालमा भित्रिँदा जनशक्ति अभावमा सुरक्षाकर्मीले सबैको सुरक्षाजाँच गर्न सकेका थिएनन् ।

प्रविधि जडानले अब भारतबाट नेपाल प्रवेश गर्नेको सहजै सुरक्षा जाँच गर्न सकिने छ ।

रुपन्देहीका प्रमुख जिल्ला अधिकारी गणेश अर्यालले अपर्याप्त जनशक्तिले मुलुकमा प्रवेश गर्ने अधिकांशको सुरक्षा जाँचसमेत नहुने भएकाले सीमा सुरक्षालाई बलियो बनाउने उद्देश्यले नाकामा ‘वाकथ्रु मेसिन’ जडान गरिएको बताए। उनले भारतबाट मुलुकमा प्रवेश गर्ने सबैको ‘वाकथ्रु मेसिन’ हुँदै सुरक्षा जाँच हुने र नेपालबाट भारत जान लागेको अवस्थामा पनि सुरक्षाकर्मीलाई शङ्का लागे जाँच गर्ने बताए।

सिद्धार्थनगर नगरपालिकाका प्रमुख इस्तियाक अहमद खाँले नगरवासीलाई सुरक्षित र भयरहित वातावरण आफ्नो व्यवसाय जीवनयापन चलाउनका लागि नगरपालिकाले प्रशासनसँग मिलेर कार्य गरिरहेको बताए।

यसअघि भैरहवा भन्सार कार्यालयले पनि राजस्व छली नियन्त्रणका लागि नाकामा एक्सरे मेसिन जडान गरेको थियो । मेसिन बिग्रिएपछि मर्मत नगरी थन्काइएको छ । जुन प्रविधि सीमाबाट हुने अपराध नियन्त्रणका लागि आवश्यक थियो। गोरखापत्रबाट