Technology Khabar १ श्रावण २०८१, मंगलवार
काठमाडौं ।
नेपाल टेलिकमले नयाँ बिलिङ्ग प्रणालीको लागि चौथो पटक टेन्डरको म्याद थप गरेको छ।
कम्पनीले आज चौथोपटक बिलिङ्ग सिस्टमको टेन्डरको म्याद थप गरेको सूचना प्रकाशित गरेको छ। जसअनुसार अब जुलाई ३१ तारिख अर्थात साउन १६ गतेसम्मको समय थपिएको हो।
पटक पटक टेन्डरको म्याद थपिएपनि आवेदन नपरेपछि टेलिकमले टेन्डरको म्याद थप्दै लगिरहेको देखिन्छ।
यसअघि कम्पनीले उक्त बिलिङ्ग सिस्टमको टेन्डरमा आवेदन नपरेपछि जेठ ६ गते सूचना जारी गरेर पहिलोपटक जेठ २९ गतेसम्मलाई ठेक्काको म्याद थपेको थियो।
सम्बन्धित समाचार-
नेपाल टेलिकमको नयाँ बिलिङ्ग सिस्टमको टेन्डरमा आवेदननै नपरेपछि समयावधि थपियो
त्यसपछि पनि दोस्रोपटक जेठ २७ गते सूचना निकाल्दै फेरि असार १८ गतेसम्म ठेक्काको समय बढाईयो भने तेस्रोपटक सूचना निकाल्दै फेरि साउन २ गतेसम्म ठेक्काको म्याद थपिएको थियो।
पटक पटक टेन्डरको म्याद थपिनु र उक्त टेन्डरमा आवेदन नपर्नुको कारणमा भने बिलिङ्गको लागि तोकिएको अमेरिकी डलरको विनियम दर रहेको छ। टेलिकम स्रोतकाअनुसार उक्त टेन्डरमा डलरको मूल्य चार वर्षअघिको दर अर्थात ११७ रुपैयाँ तोकिएको छ। तर आजको अहिलेको विनियम दरअनुसार डलरको भाउ १३४ रुपैयाँ हाराहारी रहेको छ।
स्रोतले भने अहिलेकै कम्पनीलाई थप अवधि काम गर्न दिनका लागि र पुरानै बिलिङ्ग सिस्टमलाई चलाउनका लागि यस्तो गरिएको दाबी गरेको छ।
“अहिले एशिया इन्फोले बिलिङ्ग सिस्टम अपग्रेड गर्ने र मर्मतको काम गरिरहेको छ,” स्रोतले भन्यो, “नयाँ सिस्टम लागू भएपछि त्यसको व्यवसायनै खोसिनेछ। त्यसैले यस्तो कार्य भईरहेको छ।”
यसैगरी हाल बिलिङ्ग सिस्टम चलाईरहेको कम्पनीले अहिलेको नयाँ टेन्डरमा सहभागी हुन नपाउने क्लज राखिएको हुँदा समेत चरम चलखेल गरिएको स्रोतले भन्यो।
“नयाँ टेन्डरमा अहिले सिस्टम चलाईरहेको पुरानो कम्पनी योग्यनै हुँदैन्। त्यसैले पनि आन्तरिकरुपमा चलखेल भईरहेको छ,” स्रोतले भन्यो, “४ वर्ष अगाडि बनाएको डकुमेन्टमा त्यसबेलाको ट्राफिक डाटा, सिस्टम र डलर मूल्य लगायतका विषयहरु थिए तर अहिले त्यसमा धेरै परिवर्तन भई सकेको छ।”
अर्कोतर्फ, अहिलेको बिलिङ्ग सिस्टमको जिम्मा पाएको एशिया इन्फोले आफ्नो कार्यमा चरम लापरवाही गर्ने गरेको सञ्चार तथा सूचना प्रविधि मन्त्रालयकै अनुसन्धानले देखाएको थियो।
२०७९ माघ ३ गते नेपाल दूरसञ्चार कम्पनी लिमिटेड (नेपाल टेलिकम) को नेटवर्क अवरुद्ध हुनुमा कम्पनीका व्यवस्थापनका कर्मचारीहरु तथा भेण्डरहरुको चरम लापरवाही भएको सञ्चार तथा सूचना प्रविधि मन्त्रालयले सहसचिव गौरब गिरीको संयोजकत्वमा गरेको छानबिन समितिको प्रतिवेदनले देखाएको थियो। यसैगरी, सो समितिले दिर्घकालिन सुझाबअन्तरगत टेलिकमका बिलिङ्ग प्रणालीको हार्डवेयरहरु एजिङ हुँदै गएकोले हालको मेन्टेनेन्स प्रोसिड्यूरलाई पुनरावलोकन गर्न भनेको थियो।
सम्बन्धित समाचार-
गत महिना भएको नेटवर्क समस्यामा पनि बिलिङ्ग सिस्टमलाई नै कारक मानिएको थियो।
पुरानो बिलिङ्ग सिस्टमको मर्मतमा गरिएको सम्झौता र निर्णयहरु बारेमा अख्तियार दूरुपयोग अनुसन्धान आयोगले अनुसन्धान र छानबिन गरिरहेको छ। अहिलेकै बिलिङ्ग सिस्टम चलाउने बारेमा भएको सम्झौताहरुको बारेमा अख्तियारले पाँच दर्जन कर्मचारीहरु र सरोकारबालाहरुसँग बयानसमेत लिईसकेको छ।
टेलिकमको बिलिङमा एसिया इन्फोलाई फोर प्लस वान अर्थात करिब ५ वर्षकै लागि निरन्तरता दिने निर्णयमा भ्रष्टाचारको आशंकापछि आयोगले छानबिन गरिरहेको हो।
प्रकाशित: १ श्रावण २०८१, मंगलवार
