फोल्डिङ टचस्क्रिन र शक्तिशाली प्रोसेसर भएको मिनीप्रोका मिनी पीसी अनावरण

काठमाडौं ।

मिनीप्रो ब्राण्डका मिनी पीसी लन्च गरिएको छ। नयाँ मिनी पीसीको डिजाइन असामान्य रहेको र यसमा ७ इन्चको फोल्डिङ र मल्टिपोइन्ट टच डिस्प्ले रहेको छ। साथै उक्त टचस्क्रिनलाई ९० डिग्रीमा फोल्ड गर्न सकिने छ।

यस प्रडक्टलाई हालै क्राउडफन्डिङ प्लेटफर्म किकस्टार्टरमा लन्च गरिएको र यसको बहुमुखी फाइदाका कारण यसलाई मोबाइल सिस्टम (प्रणाली) को रूपमा र सीमित ठाउँहरूमा प्रयोगलाई समर्थन गर्ने उल्लेख गरिएको छ।

मिनी पीसी मा एएमडी राइजेन ९ ६९००एचएक्स एपीयूबाट संचालित हुनेछ भने एएमडी रेडियन आरएक्स ६८०एम ग्राफिक्स इकाई एपीयूमा इन्टिग्रेट (एकीकृत) गरिएको थप उल्लेख छ। उक्त एएमडी राइजेन ९ एपीयू सन् २०२२ मा जारी गरिएको थियो तर एएमडीले पछि हाई पर्फमेन्स (उच्च प्रदर्शन) सहितको अन्य मोडेलहरू पनि जारी गरेको जनाइएको छ।

त्यसैगरी मिनीप्रोका मिनीमा ८/१६/३२जीबी क्षमताको साथ ४८०० मेगाहर्ज डीडीआर५ र्याम समावेश गरिएको छ। साथै मिनी पीसीका लागि ५१२ जीबी, १ टीबी, र २ टीबी स्टोरेज अप्सन्स (भण्डारण विकल्पहरू) उपलब्ध रहेका छन्। उक्त स्टोरेज (भण्डारण) पीसीआईई ४.० मार्फत एम.२ २२८० एसएसडी भएको थप उल्लेख छ।

मिनीप्रोका मिनी पीसी भेपोर च्याम्बर हिट स्प्रेडर र ४००आरपीएम ब्लोअर फ्यानले सुसज्जित रहेको छ। यसले गहन कार्यहरू गर्दा डिभाइसलाई चिसो गर्न मद्दत गर्नेछ। त्यसका साथै यसलाई मध्यम भिडियो गेमिङका लागि प्रयोग गर्न सकिने र कनेक्टिभिटी अप्सन्स (विकल्पहरू) मा वाइफाइ ६ई र ब्लुटुथ ५.२ समावेश रहेका छन्।

मिनीप्रोका मिनी पीसी किकस्टार्टरमा ६९९ अमेरिकी डलरको मूल्यमा उपलब्ध छ भने यसको डेलिभरीहरू सन् २०२४ को अक्टोबरमा सुरु हुने तालिका रहेको छ।