गुगल ट्रान्सलेटले नेवारी भाषालाई अनुवाद गर्नसक्ने, थपियो ११० ओटा नयाँ भाषा

काठमाडौं ।

टेक जायन्ट गुगलको ट्रान्सलेट सुबिधाले नेपालभाषा (नेवारी) मा पनि उल्था गर्नसक्ने भएको छ।

यसअघिनै अंग्रेजी, चिनियाँ हिन्दि नेपालीसहित १३३ ओटा भाषामा उल्था गर्ने सुबिधा रहेको गुगलले नयाँ ११० भाषा थपेको घोषणा गरेको छ।

कम्पनीले यसमा नेवारी भाषा पनि थप गरेको हो। यससँगै कूल १४३ भाषामा उल्था गर्ने सुविधा प्रदान गरेको गुगलले ब्लग पोष्टमा भनेको छ।

“हामीले १ हजार भाषाहरूको पहल घोषणा गर्यौं, एआई मोडेलहरू निर्माण गर्ने प्रतिबद्धता जसले विश्वभरि १ हजार धेरै बोलिने भाषाहरूलाई समर्थन गर्नेछ।

“अब, हामीले समर्थन गर्ने भाषाहरूको विविधता विस्तार गर्न एआई प्रयोग गर्दैछौं। हाम्रो पाल्म २ (PaLM 2) ठूलो भाषा मोडेलको लागि धन्यवाद, हामी गुगल अनुवादकमा ११० नयाँ भाषाहरू रोल आउट गर्दैछौं, जुन हाम्रो सबैभन्दा ठूलो विस्तार हो,” गुगलले ब्लगपोस्टमा भनेको छ।

गुगलले २०७० सालदेखि नेपालीमा पनि अनुवाद गर्न थालेको थियो।

नयाँ थपिएका भाषाहरुमध्ये एक चौथाइ अफ्रिकी मुलुकमा बोलिने भाषाहरु छन् । गुगलले कतिपय भाषा लोपजस्तै भएपनि त्यसलाई अनुवादमा समावेश गरिएको जनाएको छ।

“पाल्म २ पजलको मुख्य अंश थियो, जसले अनुवादलाई अझ कुशलतापूर्वक एकअर्कासँग घनिष्ठ रूपमा सम्बन्धित भाषाहरू सिक्न मद्दत गर्यो, जसमा हिन्दीसँग नजिकका भाषाहरू, अवधी र मारवाडी, र सेचेलोइस क्रियोल र मौरिसियन क्रियोल जस्ता फ्रान्सेली क्रियोलहरू समावेश छन्।” ब्लगमा भनिएको छ, “टेक्नोलोजीको उन्नतिको रूपमा, र हामीले विशेषज्ञ भाषाविद् र नेटिभ स्पिकरहरूसँग साझेदारी गर्न जारी राख्दा, हामी समयसँगै अझ बढी भाषा विविधताहरू र हिज्जे अधिवेशनहरूलाई समर्थन गर्नेछौं।”