सामसङले होटल, स्टोर, अफिसका लागि स्मार्टथिंग्स प्रो घोषणा गर्यो

काठमाडौं ।

अमेरिकाको लास भेगासमा बुधबारबाट शुरु भएको इन्फोकम २०२४ प्रदर्शनीमा सामसङले आफ्नो स्मार्ट होम प्लेटफर्मको इन्टरप्राइज संस्करण, बी२बी (बिजनेस–टू–बिजनेस) सलुसन्समा लक्षित स्मार्टथिंग्स प्रो प्रस्तुत गरेको छ।

कार्यालय, स्टोर वा होटल वरिपरि जडान गरिएका डिभाइसहरूका लागि इन्टिग्रेटेड म्यानेजमेन्ट (एकीकृत व्यवस्थापन) प्लेटफर्म हुनु यसको लक्ष्य रहेको जनाइएको छ। साथै यसमा होटलको कोठामा टिभी नियन्त्रण गर्ने, अफिसमा लाइटनिङ, स्टोरमा स्मार्ट साइनेज, विभिन्न एपलान्इसेस, एयर कन्डिसनिङ आदि समावेश रहेका छन्।

ड्यासबोर्डले जडान गरिएका सबै उपकरणहरूमा मनिटरिङ र कन्ट्रोल प्रदान गर्नेछ। साथै यसले एआई–आधारित व्यवस्थापनलाई पनि इनएबल गर्नेछ जसले विभिन्न डिभाइसहरूको उपयोग ढाँचाको विश्लेषण गरेर पावर बिल घटाउन सक्ने थप जनाइएको छ।

व्यवसायहरूमा लक्षित भएको हुनाले यो प्लेटफर्मले मल्टिपल स्टोर्स/स्थानहरूमा फैलिएको डिभाइसहरूको मनिटरिङ र कन्ट्रोललाई स्वाभाविक रूपमा समर्थन गर्दछ। साथै प्रत्येकको लागि, एक अन्तरक्रियात्मक फ्लोर योजना निर्माण गर्न सकिने र यसले चीजहरू थप सहज बनाउने उल्लेख छ।

यस्तै, कन्ट्रोल–हबलाई सिस्कोको भिडियो कन्फरेन्सिङ प्रणाली र एक्वाराको स्मार्ट होटल प्रडक्टहरू जस्ता उत्पादनहरूमा एकीकृत गरिने जनाइएको छ। सामसङले स्मार्टथिंग्स प्रो प्लेटफर्मको फङ्गसनेलिटी (कार्यक्षमता) विस्तार गर्न अन्य कम्पनीहरूसँग सहकार्य गरिरहेको थप उल्लेख छ।

स्मार्टथिंग्स प्रो बिस्तारै उत्तर अमेरिका र दक्षिण कोरिया लगायत विश्व बजारहरूमा रोल आउट हुने जीएसएमएरिनाले उल्लेख गरेको छ।