करिब ९५ प्रतिशत इन्टरनेट प्रयोगकर्ता सामाजिक सञ्जालमा सक्रिय

काठमाडौं ।

विश्वका सबै इन्टरनेट प्रयोगकर्तामध्ये झण्डै ९५ प्रतिशत अहिले विभिन्न सामाजिक सञ्जालमा सक्रिय छन्, जुन गत वर्षको तुलनामा चार प्रतिशतले बढी हो। गत बुधबारको एक रिपोर्टमा यो कुरा बाहिर आएको हो।

यस वर्षको अक्टोबरसम्ममा विश्वभर ५.३ अर्ब इन्टरनेट प्रयोगकर्ता थिए, जुन विश्व जनसंख्याको ६५.७ प्रतिशत हो। ओन्लीएकाउन्ट्स डट आईओ (OnlyAccounts.io) को एक तथ्यांकअनुसार इन्टरनेट प्रयोगकर्ताको संख्या एक वर्षमा १८ करोड ९० लाख वा ३.७ प्रतिशतले बढेको छ।

उही समयमा, ४.९५ अर्ब वा विश्वको करिब ६१.४ प्रतिशत जनसंख्या सोशल मिडिया प्लेटफर्महरूमा सक्रिय छ।

चाखलाग्दो कुरा के छ भने सामाजिक सञ्जाल प्रयोगकर्ताको संख्या इन्टरनेट प्रयोगकर्ताको संख्याको तुलनामा तीव्र गतिमा बढिरहेको छ। एक वर्षमा तिनीहरूको वृद्धि दर ४.५ प्रतिशत (लगभग २१.५ करोड प्रयोगकर्ताहरू) थियो।

सन् २०१९ देखि, औसत ३५ करोड मानिसहरू प्रत्येक वर्ष सोशल मिडिया प्लेटफर्ममा सामेल भएका छन्, जसले प्रयोगकर्ताहरूको कुल संख्यालाई सबै समयको उच्चमा पुर्याएको छ।

यसको विपरित प्रयोगकर्ताको संख्या बढेसँगै सामाजिक सञ्जालमा बिताउने समय पनि घटेको तथ्य पनि रहेको छ।

अक्टोबरसम्म, इन्टरनेट प्रयोगकर्ताहरूले सामाजिक सञ्जालमा हरेक दिन औसत दुई घण्टा २४ मिनेट बिताएका छन्, जुन गत वर्षको तुलनामा चार मिनेट कम रहेको डाटा रिपोर्टर सर्वेक्षणले देखाएको छ।

उही समयमा, इन्टरनेट प्रयोग गरी बिताउने औसत दैनिक समय चार मिनेट बढेर ६ घण्टा ४१ मिनेट पुगेको छ।

स्ट्याटिस्टा सर्वेक्षणकाअनुसार आगामी ५ वर्षमा १ अर्ब १ करोडभन्दा बढी व्यक्ति सामाजिक सञ्जालमा जोडिने र प्रयोगकर्ताको कुल संख्या ६ अर्ब पुग्नेछ।