काठमाडौं ।
सामसङले हालै आफ्नो नयाँ फोल्ड गर्न मिल्ने स्मार्टफोन ग्यालेक्सी जेड फोल्ड ५ र ग्यालेक्सी जेड फ्लिप ५ लन्च गरेको छ। यी दुई फोल्डेबल स्मार्टफोन पछि कम्पनीले अब फोल्डेबल ट्याब्लेट र फोल्डेबल डिस्प्ले भएको ल्यापटपको तयारी गरिरहेको छ।
दक्षिण कोरियाली कम्पनीको फ्लेक्सिबल स्क्रिन ट्याब्लेट र ल्यापटपको कन्सेप्ट मोडेलको विवरण सार्वजनिक भएको छ। सामसङ इलेक्ट्रोनिक्सका अध्यक्ष टीएम रोहले द इन्डिपिडेन्ट अनलाइन प्लेटफर्मसँग कुरा गर्दै, सामसङले लचिलो स्क्रिन भएका ट्याब्लेट र ल्यापटपमा काम गरिरहेको पुष्टि गरेका छन्। यसका लागि कम्पनीले ठूलो लगानी गरेको छ। यसको आधारभूत प्रविधिको विकास भएपछि यसलाई उपभोक्ताका लागि बजारमा ल्याइनेछ।
यद्यपि, दक्षिण कोरियाली कम्पनीका शीर्ष अधिकारीले आगामी फोल्डेबल स्क्रिनका साथ यी उपकरणहरू लन्चको लागि कुनै टाइमलाइन साझा गरेका छैनन्। यस्तो देखिन्छ कि यी उपकरणहरू हाल अनुसन्धान र इन्नोभेसनकै चरणमा छन्। परीक्षण सकिएपछि उपभोक्ताका लागि बजारमा ल्याउन सकिनेछ।
सामसङ २०१३ देखि फोल्डेबल डिस्प्ले टेक्नोलोजीमा गम्भीर छ। धेरै वर्षको परीक्षणपछि कम्पनीले आफ्नो पहिलो फोल्डेबल फोन ग्यालेक्सी फोल्ड २०१९ मा सार्वजनिक गरेको थियो । सन् २०१३ मा आयोजित सीईएसमा, कम्पनीले सामसंग युवम नामक अवधारणा मोडेल प्रदर्शन गर्यो, जुन पहिलो ग्यालेक्सी फोल्डको प्रोटोटाइप भएको मानिन्छ।
“फ्लेक्स जी” को नामबाट लन्च हुने!
कम्पनीले यस वर्ष आयोजित कन्ज्युमर इलेक्ट्रोनिक्स शो (सीईएस २०२३) र मोबाइल वर्ल्ड कांग्रेस (एमडब्लुसी २०२३) मा फोल्डेबल डिस्प्लेका साथ धेरै उपकरणहरू प्रदर्शन गरेको थियो। कम्पनीले यी मध्ये दुईओटा फोल्डिङ ट्याब्लेट र लचिलो ल्यापटपमा काम गरिरहेको छ।
पहिलो सामसंग ट्याब्लेटमा, स्क्रिन दायाँ तर्फबाट २ इन्च पप आउट हुनेछ, जबकि दोस्रो प्रोटोटाइप ट्रिपल फोल्ड स्क्रिन भएको ट्याब्लेटको हो। कम्पनीले आफ्नो फोल्डेबल ट्याब्लेटलाई ‘फ्लेक्स-जी’ नामबाट बजारमा ल्याउन सक्नेछ।
प्रकाशित: ३ भाद्र २०८०, आईतवार
