काठमाडौं ।
एन्ड्रोइड प्रयोगकर्ताहरूको लागि यो महत्त्वपूर्ण खबर हो। टेक दिग्गज गुगलले एन्ड्रोइड ४.४ किटक्याट संस्करणको लागि समर्थन समाप्त गर्ने घोषणा गरेको छ।
सरल भाषामा भन्नुपर्दा, यस संस्करणमा काम गर्ने स्मार्टफोनले गुगलको सेवा र अपडेटहरू आगामी दिनमा प्राप्त गर्नेछैन। प्रयोगकर्ताहरूले यी उपकरणहरूमा कुनै पनि एप प्रयोग गर्न सक्षम हुने छैनन्। गुगलले समय-समयमा एन्ड्रोइडका नयाँ भर्सनहरू ल्याइरहन्छ र धेरै पुरानो भइसकेका भर्सनहरू बन्द गरिदिन्छ।
यी स्मार्टफोनहरू अगस्ट १ देखि प्रयोगमा नआउने
आफ्नो रिपोर्टमा, जीएसएमएरिनाले गुगलको विकासकर्ता ब्लगपोस्टलाई उद्धृत गर्दै एन्ड्रोइड ४.४ किटक्याटको लागि समर्थन अगस्तको शुरुमा समाप्त हुने जानकारी दिएको छ। यदि तपाईको स्मार्टफोनले किटक्याट वा त्यसभन्दा पहिलेको एन्ड्रोइड संस्करणमा काम गर्छ भने, त्यसले गुगलको समर्थन पाउने छैन। यसको मतलब अगस्ट १ देखि यस्ता डिभाइसहरू प्रयोगमा आउने छैनन् वा ती संचालन गर्न सकिनेछैन्।
मिडिया रिपोर्टहरूमा थप भनिएअनुसार अझैपनि एन्ड्रोइड स्मार्टफोन र ट्याब्लेटको १ प्रतिशत किटक्याट अपरेटिङ सिस्टममा काम गर्दछ। अर्को महिनादेखि यी ग्याजेटहरूले गुगलको समर्थन पाउने छैनन्।
ओएस सुरक्षित नहुने
गुगल सपोर्ट बन्द हुँदा एन्ड्रोइड ४.४ किटक्याट ओएस कुनै पनि अवस्थामा सुरक्षित हुने छैन। यस्तो अवस्थामा डिभाइस ह्याकिङ र पर्सनल डिटेल्स चोरी हुने सम्भावना बढ्छ।
एन्ड्रोइड किटक्याट २०१३ मा लन्च
प्रविधि कम्पनी गुगलले सन् २०१३ मा एन्ड्रोइड किटक्याट अपरेटिङ सिस्टम लन्च गरेको थियो । यस ओएसमा वायरलेस प्रिन्टिङ, छिटो बहु-टास्किङ, परिष्कृत एनएफसी र राम्रो कनेक्टिभिटी समर्थित थियो। यसअघि कम्पनीले एन्ड्रोइड ४.१, ४.२ र ४.३ जेली बिन अपरेटिङ सिस्टम बन्द गरेको थियो।
स्मरणरहोस् गुगलले यस वर्ष अप्रिलमा आफ्नो पछिल्लो एन्ड्रोइड १४ को बीटा संस्करण जारी गरेको छ।
प्रकाशित: १३ श्रावण २०८०, शनिबार
