काठमाडौं ।
लोकप्रिय छोटो भिडियो प्लेटफर्म टिकटकले भारतमा आफ्नो बाँकी व्यवसाय बन्द गर्ने निर्णय गरेको छ। चिनियाँ कम्पनी बाइटडान्सको यो एपको भारतमा सेल्स सपोर्ट टोली हालसम्म राखिएको थियो। यो टोली तीन वर्ष पहिले कम्पनीको विश्वव्यापी बिक्री टोलीहरूलाई समर्थन गर्न नियुक्त गरिएको थियो।
टिकटकका प्रवक्ताले एक विज्ञप्तिमा भने, “हामीले भारतमा हाम्रो रिमोट सेल्स सपोर्ट हब बन्द गर्ने निर्णय गरेका छौं। हामी यस कठिन समयमा हामीलाई सहयोग गर्ने कामदारहरूप्रति आभारी छौं।”
देशको सुरक्षामा जोखिम देखिएको भन्दै भारतको केन्द्र सरकारले करिब तीन वर्षअघि चीनसँग सम्बन्धित करिब ६० एपमाथि प्रतिबन्ध लगाएको थियो। यी एपहरूमा टिकटक पनि समावेश थियो। यसपछि बाइटडान्सले देशमा कामदारको संख्या घटाएको थियो। प्रतिबन्ध अघि, टिकटकको देशमा करिब २० करोड प्रयोगकर्ता रहेको अनुमान गरिएको छ। यसबाट भारतका धेरै इन्फ्लुएन्सरहरूलाई पनि नोक्सान भयो।
युट्युब शर्टस र इन्स्टाग्राम रील्स बाहेक, मोज र जोश जस्ता छोटो भिडियो एपहरू पनि भारतका इन्फ्लुएन्सरहरू र भिडियो सिर्जनाकर्ताहरूमाझ धेरै लोकप्रिय भएको बताईएको छ।
टिकटकले चीनसँगको सम्बन्धका कारण धेरै देशहरूमा कठिनाइको सामना गरिरहेको छ। गत वर्षको अन्त्यमा अमेरिकामा सरकारी कर्मचारीका लागि यो प्रतिबन्ध लगाइएको थियो। अमेरिकी सरकारले दिएको स्मार्टफोनमा कर्मचारीले टिकटक प्रयोग गर्न पाउने छैनन्। हाउस एडमिनिस्ट्रेशन समिति (सीओए) ले कर्मचारीलाई यो जानकारी दिएको हो। टिकटकको एप अमेरिकामा साइबर सुरक्षाका लागि ठूलो जोखिम मानिन्छ।
सीओएले कर्मचारीहरूलाई आफ्नो ह्यान्डसेटबाट तुरुन्तै यो एप हटाउनुपर्ने बताए। यदि तिनीहरूले यसो गरेनन् भने, तिनीहरू समस्यामा पर्न सक्छन्। यो प्रतिबन्ध सीओएमा मात्र सीमित छैन। यो अमेरिकी सरकार अन्तर्गतका सबै संस्था र एजेन्सीहरूमा लागू हुनेछ।
धेरै देशहरूमा यो एपका लागि कठिनाइहरू बढ्दै गएका छन्। यसको प्रमुख कारण बाइटडान्सले डाटा भण्डारण, गोपनीयता र अन्य केही मुद्दाहरूमा चिनियाँ सरकारको नीतिको पालना गर्नु हो। टिकटकमाथि प्रयोगकर्ताको डाटा र अन्य संवेदनशील जानकारीको दुरुपयोग गरेको आरोप पनि लागेको छ।
प्रकाशित: २९ माघ २०७९, आईतवार
