काठमाडौं ।
भारतीय एजुटेक फर्म बाइजुले बालबालिका र उनीहरूका अभिभावकको फोन नम्बर लिएको र फर्मद्वारा प्रस्तावित पाठ्यक्रमहरू किन्न दबाब दिएको भारतको राष्ट्रिय बालअधिकार आयोग (एनसीपीसीआर) ले आरोप लगाएको छ।
विद्यार्थीहरूलाई गलत जानकारी दिएर पाठ्यक्रमहरू बेचेको आरोपमा एनसीपीसीआरले फर्मका सीईओ बिजु रवीन्द्रनलाई डिसेम्बर २३ मा जवाफ दिन बोलाएको भारतीय मिडियाले जनाएका छन्।
एनसीपीसीआर प्रमुखले भने, “हामीले थाहा पाएका छौं कि बाइजुले बालबालिका र उनीहरूका अभिभावकको फोन नम्बरहरू लिइरहेको छ र उनीहरूलाई पाठ्यक्रम किन्न धम्की दिइरहेको छ। हामी कारबाही गर्छौं र आवश्यक परेमा सरकारलाई रिपोर्ट गर्नेछौं।”
एनसीपीसीआरले मिडिया रिपोर्टको आधारमा यो कदम चालेको हो। यसले फर्मको बिक्री टोलीले अभिभावकहरूलाई उनीहरूको पाठ्यक्रम खरिद गर्न मनाउन अनुचित माध्यम प्रयोग गरिरहेको बताएको छ।
बाइजुले ग्राहकहरूलाई पाठ्यक्रमहरूको लागि ऋण सम्झौता गर्न दबाब दिइरहेको विज्ञप्तिमा मिडिया रिपोर्टहरूलाई उद्धृत गर्दै भनिएको छ। ग्राहकहरूले यी पाठ्यक्रमहरूको लागि भुक्तान गरेपछि फिर्ता पाउन सक्दैनन्। आयोगले फर्मलाई अभिभावकबाट धेरै गुनासो आइरहेको तर त्यसमा केही गर्न नसकेको बताएको छ।
आयोगले रवीन्द्रनलाई व्यक्तिगत रुपमा उपस्थित भई यस विषयमा जानकारी दिन भनेको छ। रविन्द्रनले कुनै वैध कारणबिना हाजिर हुन अस्वीकार गरे त्यसको परिणाम भोग्नुपर्ने आयोगले जनाएको छ।
प्रकाशित: ६ पुष २०७९, बुधबार
