काठमाडौं ।
ह्याकरहरूले मेसेजिङ सेवा ह्वाट्सएपका करोडौं प्रयोगकर्ताको डाटा चोरी गरेका छन्। यसमा अमेरिका, बेलायत साउदी अरेबिया, भारत, बंगलादेशलगायत ८४ देशका प्रयोगकर्ताहरू समावेश छन्।
ह्याकरहरूले यो डाटा अनलाइनमा बेच्न खोजिरहेका छन्। यो डाटामा ८४ देशका ह्वाट्सएप प्रयोगकर्ताहरूको मोबाइल नम्बरहरू समावेश छन्।
साइबरन्यूजको रिपोर्टमा ह्याकिङ कम्युनिटी फोरममा विज्ञापन गरेर ४८ करोड ७० लाख ह्वाट्सएप प्रयोगकर्ताको मोबाइल नम्बर बिक्री गरेको दाबी गरिएको छ। यो जानकारी प्रायः फिसिङ आक्रमणहरूमा प्रयोग गरिन्छ।
यस कारणले गर्दा, ह्वाट्सएप प्रयोगकर्ताहरूले अज्ञात नम्बरहरूबाट आउने कल र म्यासेजहरूबाट टाढा रहनुपर्छ। फेसबुक र ह्वाट्सएपको स्वामित्वमा रहेको मेटाको प्लेटफर्मबाट डाटा चोरी भएको यो पहिलो पटक भने होइन।
गत वर्ष एक ह्याकरले ५० करोडभन्दा बढी फेसबुक प्रयोगकर्ताको जानकारी सित्तैमा दिने प्रस्ताव राखेका थिए। यसमा यी प्रयोगकर्ताहरूको फोन नम्बर र अन्य विवरणहरू समावेश थिए।
“यस युगमा, हामी सबैले ठूलो डिजिटल फुटप्रिन्ट छोड्छौं र मेटा जस्ता टेक दिग्गजहरूले त्यो डाटा सुरक्षित गर्न सबै सावधानी र माध्यमहरू लिनुपर्दछ,” साइबरन्यूज अनुसन्धान टोलीका प्रमुख मान्तास सास्नाउस्कसले भने।
ह्वाट्सएपमा विश्वभर दुई अर्ब मासिक सक्रिय प्रयोगकर्ता रहेको अनुमान गरिएको छ।
प्रकाशित: १२ मंसिर २०७९, सोमबार
