काठमाडौं ।
भारतीय अर्बपति मुकेश अम्बानीले दुई महिना भित्र देशमा ५जी मोबाइल इन्टरनेट सेवाहरू सुरु गर्न २५ अर्ब डलरको योजना घोषणा गरेका छन्।
टेलिकमदेखि रिटेल समूह रिलायन्स इन्डस्ट्रिजको प्रमुख रहेका अम्बानीले नयाँ दिल्ली र मुम्बई लगायतका प्रमुख सहरहरूमा उच्च गतिको सञ्जाल सुरु गरिने बताएको बीबीसीले रिपोर्ट गरेको छ।
त्यसपछि सन् २०२३ को डिसेम्बरसम्म भारतको बाँकी भागमा विस्तार गरिने उनले बताए।
कम्पनीले गुगलसँग बजेट ५जी स्मार्टफोन विकास गर्न पनि काम गरिरहेको छ।
सोमबार रिलायन्सको वार्षिक साधारण सभामा अम्बानीले भने, “फर्मको ५जी नेटवर्क पूर्ण रूपमा सञ्चालन भएपछि यो संसारमा सबैभन्दा ठूलो हुनेछ।”
यो सेवा रिलायन्सको सहायक कम्पनी जियो मार्फत उपलब्ध गराइनेछ, जुन भारतको सबैभन्दा ठूलो मोबाइल क्यारियर हो।
रिलायन्सले अमेरिकी टेक्नोलोजी दिग्गज गुगलसँग “अल्ट्रा-किफायती” ५जी स्मार्टफोन विकास गर्न काम गरिरहेको समेत उनले जानकारी दिए तर यसको मूल्य वा योजनाबद्ध लन्च मिति बारे थप विवरणहरू दिईएको छैन्।
भारतमा सबैभन्दा सस्तो ५जी स्मार्टफोनहरूको मूल्य हाल लगभग १५० डलर रहेको बीबीसीले उल्लेख गरेको छ।
भारतको डिजिटल भविष्यमा प्रभुत्वको लागि लडाइँ चर्किरहेको बेला यो घोषणाहरू आएको हो।
यस महिनाको सुरुमा, भारत सरकारले फाइभजी एयरवेभहरूसहित एयरवेभहरूका लागि रेकर्ड १९ अर्ब डलरको लिलामी सम्पन्न गर्यो, जहाँ जियो शीर्ष खरीददारको रूपमा देखा पर्यो।
यसले अन्य प्रमुख खेलाडीहरू भोडाफोन आइडिया र भारती एयरटेल र चौथो नयाँ प्रवेशकर्ता अडानी डाटा नेटवर्कहरूबाट बोलपत्रहरू पनि आकर्षित गर्यो।
प्रकाशित: १४ भाद्र २०७९, मंगलवार
