काठमाडौं ।
सोनी प्लेस्टेशनलाई बेलायतमा ५ अर्ब पाउण्डको लागि मुद्दा दायर गरिएको छ जसमा कम्पनीले आफ्ना ग्राहकहरूलाई धेरै मूल्यमा खेल र इन-गेम खरिदहरु गर्न बाध्य पारेको आरोप लगाईएको छ।
उपभोक्ता अधिकार च्याम्पियन एलेक्स नीलको नेतृत्वमा भएको समूह कानुनी कारबाहीले लगभग ९० लाख गेमरहरूलाई क्षतिपूर्ति दिलाउन सक्ने बीबीसीले रिपोर्ट गरेको छ।
यसले सोनी प्लेस्टेशनले प्रतिस्पर्धा कानून उल्लङ्घन गरेको दाबी गरेको छ भने खेलका विकासकर्ता र प्रकाशकहरूमा अनुचित नियम र सर्तहरू थोपरेको छ र मूल्यहरू बढाएको बताईएको छ।
“खेल सकियो,” नीलले भनिन्। तर सोनी प्लेस्टेशनले यसमा अझै टिप्पणी गरेको छैन।
प्रतिस्पर्धा पुनरावेदन न्यायाधिकरणमा दायर गरिएको दाबीमा गेमिङ कम्पनीले अनलाइन प्लेस्टेशन स्टोरमार्फत प्रत्येक डिजिटल गेम वा इन-गेम खरिदमा ३० प्रतिशत कमिशन सहित गेमका विकासकर्ता र प्रकाशकहरूलाई टर्म्स एण्ड कण्डिसनहरू लागू गर्न मार्केट लिडरको रूपमा आफ्नो स्थितिको दुरुपयोग गरेको आरोप लगाइएको छ।
कानूनी मुद्दाले सोनी प्लेस्टेशनका कार्यहरूले उपभोक्ताहरूका लागि मूल्यहरू बढाएको दाबी गरेको छ, जसको परिणामस्वरूप ग्राहकहरूले डिजिटल गेमिङ खरिदका लागि गत छ वर्षमा कुल ५ अर्ब पाउण्डसम्म अनजानमा अतिरिक्त भुक्तान गरेका थिए।
रिपोर्टकाअनुसार दाबीमा प्रति व्यक्ति अनुमानित क्षतिपूर्ति ६७ पाउण्डदेखि ५६२ पाउण्डबीचमा हुने भनिएको छ।
यो अगस्ट २०१६ देखि आफ्नो कन्सोल वा प्लेस्टेशन स्टोरमार्फत डिजिटल गेमहरू वा एड-अन सामग्री खरिद गर्ने कुनै पनि ग्राहकमा लागू हुन्छ।
“यस कानुनी कारबाहीको साथ, म बेलायतका लाखौं मानिसहरूको पक्षमा उभिरहेकी छु जसले अनजानमा बढी शुल्क तिरेका छन्,” उनले भनिन्, “हामी विश्वास गर्छौं कि सोनीले आफ्नो स्थितिको दुरुपयोग गरेको छ र आफ्ना ग्राहकहरूलाई ठगेको छ।”
प्रकाशित: ७ भाद्र २०७९, मंगलवार
