काठमाडौं ।
हालसालै गुगल प्ले स्टोर र एप स्टोरले भारतमा अनलाइन गेम ब्याटल ग्राउन्ड मोबाइल इन्डिया (बीजीएमआई) एप ब्लक गरेका छन् र यस्तो गर्नका लागि भारतीय सरकारले आदेश दिएको थियो।
चर्चित अनलाइन गेम पब्जी मोबाइल भारतमा प्रतिबन्ध लगाइएपछि क्राफ्टनले यो गेम लन्च गरेको थियो। पब्जी मोबाइलमा प्रतिबन्ध लगाइएको लामो समय पछि ब्याटल ग्राउन्ड मोबाइल इन्डियाको आगमनले भारतीय गेमरहरूलाई राहत मिलेको थियो।
गुगलले यसअघि एक आधिकारिक बयानमा भनेको थियो, “हामीले प्रभावित विकासकर्तालाई सूचित गरेका छौं र एपको पहुँच रोकेका छौं।”
तर अब भारत सरकारले बीजीएमआईलाई प्रतिबन्ध लगाउनुमा डाटा शेयरिङलाई कारण मानिएको छ।
यद्यपि यो गेम किन हटाइयो भन्ने बारे कुनै आधिकारिक जानकारी छैन, तर रोयटर्सको रिपोर्ट अनुसार बीजीएमआईलाई आईटी कानूनको धारा ६९ए अन्तर्गत प्रतिबन्ध लगाइएको छ।
यो सोही कानून हो जस अन्तर्गत अन्य चिनियाँ एपहरू भारतीयमा प्रतिबन्धित थिए। अब, यो गेम भारतमा प्ले स्टोर वा एप स्टोरमा डाउनलोड गर्न उपलब्ध छैन। यद्यपि, प्रयोगकर्ताहरू जसले पहिले नै आफ्नो स्मार्टफोनमा खेल इन्स्टल गरिसकेका छन् उनीहरुले अझै पनि यसलाई खेल्न सक्छन् किनभने यसको सर्भर अझै सक्रिय छ।
एक भारतीय सरकारी स्रोतलाई उदृत गर्दै रिपोर्टमा भनिएअनुसार दक्षिण कोरियाली गेम डेभलपमेन्ट फर्म क्राफ्टनको लोकप्रिय गेम बीजीएमआईको पहुँच रोक्नुमा यसले चीनमा डाटा साझेदारी गरेको कारण रहेको छ।
प्रकाशित: १६ श्रावण २०७९, सोमबार
