काठमाडौं ।
चिनियाँ स्मार्टफोन निर्माता शाओमी कर्पले कोभिड १९ नियन्त्रण र लकडाउनले चीनमा मागलाई असर गरेकोले पहिलो त्रैमासिक राजस्वमा गिरावट आएको रिपोर्ट गरेको छ। यसका साथै रुसको युक्रेनमाथिको आक्रमणलगायत फराकिलो आर्थिक असरले लागतमा थप गरेको बताएको छ।
रेफिनिटिभ डाटाले देखाएअनुसार मार्च ३१ मा समाप्त भएको त्रैमासिकमा राजस्व गत वर्ष ७६.८८ अर्बबाट घटेर ७३.३५ अर्ब युआन (१०.८५ अर्ब डलर) मा आयो र विश्लेषकहरुले अनुमान गरेको ७४.३ अर्ब युआन भन्दा कम भएको रोयटर्सले उल्लेख गरेको छ।
“पहिलो त्रैमासिकमा सम्पूर्ण उद्योगले चुनौतिहरूको सामना गर्यो, पहिले कम्पोनेन्टको अभाव, त्यसपछि कोभिड-१९ को पुनरुत्थान र समष्टिगत आर्थिक वातावरणमा पनि प्रभाव,” कम्पनीका अध्यक्ष वाङ सियाङले बिहीबार भने, “यी चुनौतिहरूले हाम्रो व्यवसायलाई ठूलो धक्का दिएको छ।”
उनले उल्लेख गरेअनुसार कोभिड प्रकोपले पहिले हङ्गकङ्ग र त्यसपछि सांघाईमा ढुवानी अवरुद्ध गरेको थियो, महिनौं लामो सांघाई लकडाउन र युक्रेनमा शुरु भएको द्वन्द्वले दोस्रो त्रैमासिकमा राजस्वमा असर पर्ने सम्भावना छ।
यस त्रैमासिकमा स्मार्टफोनको ढुवानी २२.१ प्रतिशतले घटेर ३८.५ मिलियन युनिटमा पुगेको शाओमीले बिहीबार एक विज्ञप्तिमा बताएको छ।
यस अवधिमा घाटा ५३०.७ मिलियन युआन पुगेको छ, जुन अघिल्लो वर्षको सोही अवधिमा ७.७९ अर्ब युआनको नाफा भएको थियो।
शाओमीले मोबाइल ह्यान्डसेटहरू बेचेर आफ्नो राजस्वको ठूलो हिस्सा उत्पन्न गर्छ। स्मार्टफोन राजस्व त्रैमासिकमा ४५.८ अर्ब युआनमा झरेको बताएको छ।
चिनियाँ कम्पनी र प्रतिद्वन्द्वी फोन निर्माताहरू भिभो र ओप्पोले सप्लायरहरूलाई अर्को केही क्वार्टरका लागि लकडाउन र आपूर्ति शृङ्खला अवरुद्ध भएका कारण २० प्रतिशत भन्दा बढीले अर्डर कटौती गर्न भनेका निक्कीले बुधबार रिपोर्ट गरेको छ।
अर्कोतर्फ शाओमी भारतमा फेब्रुअरीदेखि कथित अवैध रकम विदेशमा स्थानान्तरणको सम्बन्धमा अनुसन्धानको दायरामा छ।
प्रकाशित: ६ जेष्ठ २०७९, शुक्रबार
