काठमाडौं ।
अमेरिकाको क्यालिफोर्नियाका एक जिल्ला न्यायाधीशले ट्विटर विरुद्ध पूर्व अमेरिकी राष्ट्रपति डोनाल्ड ट्रम्पको मुद्दा खारेज गरेका छन्। अदालतले २०२१ मा ट्विटर प्लेटफर्ममा पूर्व अमेरिकी राष्ट्रपतिलाई प्रतिबन्ध लगाउन पूर्ण रूपमा कानूनी भएको बताएको छ।
अदालतले, ट्रम्पको मुद्दा खारेज गर्दै, उनी र अन्य प्रतिबन्धित प्रयोगकर्ताहरूको समूहलाई संशोधित उजुरी दायर गर्न मे २७ सम्मको समय दिएको छ।
डोनाल्ड ट्रम्पले ट्विटरबाट आफूमाथि लगाइएको प्रतिबन्ध हटाउन अदालतमा निवेदन दिएका थिए, जसलाई अदालतले खारेज गरिदिएको हो।
सीएनबीसीको रिपोर्ट अनुसार क्यालिफोर्नियाको संघीय जिल्ला अदालतका न्यायाधीश जेम्स डोनाटोले पूर्व राष्ट्रपति ट्रम्पको याचिका खारेज गरे तर अझै पनि उनलाई संशोधित उजुरी दर्ता गर्न समय दिएका छन्।
ट्रम्प र प्रतिबन्धित प्रयोगकर्ताहरूको बाँकी समूहसँग अब मे २७ सम्मको थप समय छ। तत्कालीन अमेरिकी राष्ट्रपति डोनाल्ड ट्रम्पको ट्विटर एकाउन्टलाई ८ जनवरी २०२१ मा माइक्रो ब्लगिङ प्लेटफर्मले प्रतिबन्ध लगाएको थियो। ट्विटरले उनलाई प्रतिबन्ध लगाउनुको कारणमा क्यापिटल हिलमा भएको दंगा र हिंसा भड्काउने जोखिमलाई उद्धृत गरेको थियो।
त्यसपछि डोनाल्ड ट्रम्पले गत वर्ष अर्थात् २०२१ मा फ्लोरिडामा ट्विटरविरुद्ध मुद्दा दायर गरेका थिए जसलाई पछि ट्विटरको होमस्टेट क्यालिफोर्नियामा पठाइएको थियो।
ट्रम्पले युट्युब र मेटा (जुन त्यसबेला फेसबुक थियो) विरुद्ध पनि उस्तै किसिमको मुद्दा दायर गरेका थिए।
प्रकाशित: २५ बैशाख २०७९, आईतवार
