स्मार्टवाच प्रति आकर्षण बढ्दो, नौ महिनामा आए साढ‍े ३ लाख हाराहरी डिभाइस

काठमाडौं ।

-साजन सुवेदी

चालु आर्थिक वर्ष २०७८/७९ को चैत्र मसान्तसम्म नेपालमा ४८ करोड ५८ लाख १५ हजार रुपैयाँ बराबरका स्मार्टवाच आयात भएका छन्।

यो तथ्याङ्क भन्सार विभागले हालै अद्यावधिक गरेको यो आर्थिक वर्षको चैत्र मसान्तसम्मको प्रतिवेदनमा उल्लेख गरिएको छ।

तथ्याङ्क अनुसार आर्थिक वर्षको नौ महिनाको अवधिमा उक्त रकम बराबरको ३ लाख ३८ हजार ९१८ थान स्मार्टवाच आयात गरिएको हो।

यो आँकडा शुरुवाती ८  महिना अर्थात् फागुन मसान्तसम्म ४५ करोड ३२ लाख ६५ हजार तथा माघ मसान्तसम्म ४३ करोड १० लाख ८३ हजार रुपैयाँको थियो।

यस हिसाबले माघदेखि फागुनसम्मको एक महिनामा २ करोड २१ लाख ८० हजार रुपैयाँ तथा फागुनदेखि चैत्रसम्मको एक महिनामा ३ करोड २५ लाख ५० हजार रुपैयाँ बराबरको स्मार्टवाच आयात भएका देखिन्छ।

यस्तै सङ्ख्याका हिसाबले माघदेखि फागुन मसान्तसम्मको अवधिमा भने १६ हजार ३० थानले बढेकोमा फागुनदेखि फागुन मसान्तसम्मको अवधिमा भने १३ हजार ८७० थान स्मार्टवाचको आयात बढेको देखिन्छ।

सबैभन्दा बढी चीनबाट ३,२०,०५८ थान

आयात भएकामध्ये चीनबाट सबैभन्दा धेरै अर्थात् ३ लाख २० हजार ५८ ओटा तथा भारत बाट १३ हजार ७२९ ओटा स्मार्टवाचहरु आयात भएका छन्।

यी स्मार्टवाचका मूल्यमध्ये चीनबाट आयात गरिएकाको ३८ करोड २७ लाख १ हजार तथा भारतबाट ल्याइएकाको २ करोड ४३ लाख ६७ हजार रुपैयाँ रहेको छ।

यसबाहेक यो आर्थिक वर्षको ९ महिनाको अवधिमा अन्य २२ देशबाट पनि विभिन्न सङ्ख्यामा स्मार्टवाचहरु आयात भएको प्रतिवेदनमा उल्लेख छ। उक्त सूचीलाई तालिकामा यसरी हेर्न सकिन्छ।