काठमाडौं ।
फाइभजी कनेक्टिभिटी अझै विश्वभरमा पुग्न सकेको छैन तर फाइभजी स्मार्टफोन आएको धेरै वर्ष भइसक्यो। नेपालमा ५जी नेटवर्क आउन अझै बाँकी छ तर स्मार्टफोन ब्रान्डहरूले यहाँ फोरजी मोडेलहरूका साथसाथै ५जी डिभाइसहरू पनि बिक्री गर्दै आएका छन्।
एक रिपोर्टकाअनुसार अब यी ५जी स्मार्टफोनले बिक्रीको हिसाबले फोरजी फोनलाई उछिनेको छ।
बजार अनुसन्धान फर्म, काउन्टरप्वाइन्ट रिसर्चका अनुसार यस वर्ष जनवरीमा पहिलो पटक विश्वमा ५जी स्मार्टफोनको बिक्रीले फोरजी ह्यान्डसेटको बिक्रीलाई उछिनेको छ। सूचीमा सबैभन्दा महत्त्वपूर्ण योगदान चीनको थियो, त्यसपछि पश्चिमी युरोप र उत्तर अमेरिकाका बजारहरुको सहयोग थियो।
फाइभजी फोन फोरजी स्मार्टफोन भन्दा बढी बिक्री
काउन्टरपोइन्ट रिसर्चको ‘ग्लोबल मन्थली ह्यान्डसेट मोडल सेल्स ट्र्याकर’ रिपोर्ट अनुसार जनवरी २०२२ मा पहिलो पटक फोरजी स्मार्टफोन बिक्रीलाई उछिनेर फाइभजी स्मार्टफोनको बिक्री विश्वव्यापी रूपमा ५१ प्रतिशत पुगेको छ।
अनुसन्धान फर्मको रिपोर्ट अनुसार चीनमा बिक्री हुने स्मार्टफोनमध्ये ८४ प्रतिशत फाइभजी डिभाइस थिए। अर्को नम्बर पश्चिमी युरोपको हो, जहाँ ७६ प्रतिशत ५जी स्मार्टफोन बेचेका थिए, र त्यसपछि उत्तर अमेरिका आउँछ, जहाँ यो संख्या ७३ प्रतिशत थियो।
रिपोर्टमा भनिएअनुसार चिनियाँ टेलिकम अपरेटरहरूले फाइभजीलाई समर्थन गर्न थालेका छन् र ५जी स्मार्टफोनको आपूर्ति पनि बढेको छ। चीनका स्मार्टफोन ब्रान्डहरू सस्तो मूल्यमा फाइभजी फोनहरू उपलब्ध गराउन निरन्तर प्रतिस्पर्धा गरिरहेका छन्।
जहाँसम्म पश्चिमी यूरोप र उत्तर अमेरिकाको सम्बन्ध छ, रिपोर्ट अनुसार, एप्पलले आईफोन १२ सिरिजका साथ ५जी स्मार्टफोनहरू प्रस्तुत गरेको थियो र दुबै बजार क्षेत्रहरूमा राम्रो बिक्री हासिल गरेको छ। यो विश्वास गरिन्छ कि आईफोन १३ सिरिजले यी दुवै क्षेत्रका मानिसहरूलाई ५जीमा स्विच गर्न प्रोत्साहित गरेको छ।
काउन्टरप्वाइन्टका अनुसार यी क्षेत्रहरूले विश्वव्यापी रूपमा ५जी स्मार्टफोन बिक्रीको वृद्धिमा मुख्य भूमिका खेल्न जारी राख्नेछन्। अनुसन्धान फर्मले क्वालकम र मिडियाटेक जस्ता चिप निर्माताहरूले किफायती चिपसेटहरू विकास गरेकोमा श्रेय दिएको छ। जसका कारण एन्ड्रोइड ५जी स्मार्टफोनको मूल्य घटेको र बिक्री बढेको बताइएको छ।
प्रकाशित: ६ चैत्र २०७८, आईतवार
