काठमाडौं ।
विश्वव्यापी चिप अभाव तर बलियो मागको बीचमा चीनको सबैभन्दा ठूलो चिप निर्माता सेमीकन्डक्टर म्यानुफ्याक्चरिङ इन्टरनेशनल कर्पोरेशन (एसएमआईसी)ले गत वर्ष रेकर्ड राजस्व र नाफामा वृद्धि भएको रिपोर्ट गरेको छ।
एसएमआईसीले २०२१ मा ५.४४ अर्ब डलरको राजस्व रेकर्ड गर्यो, जुन २०१० पछिको सबैभन्दा छिटो वृद्धि दर हो । नाफा १.७ अर्ब डलरमा आयो जसमा १३८ प्रतिशतको वार्षिक वृद्धि भएको सीएनबीसीले उल्लेख गरेको छ।
सन् २०२०मा अमेरिकी व्यापार कालोसूचीमा राखिएको भए पनि एसएमआईसीले रेकर्ड परफरमेन्स गरेको हो।
“चीपको विश्वव्यापी अभाव र स्थानीय र स्वदेशी उत्पादनको लागि बलियो मागले कम्पनीलाई दुर्लभ अवसर ल्यायो, जबकि ‘इन्टिटी लिस्ट’ को प्रतिबन्धले कम्पनीको विकासमा धेरै बाधाहरू खडा गरेको छ,”एसएमआईसीले एक विज्ञप्तिमा भन्यो।
कालोसूचीले एसएमआईसीलाई सबैभन्दा एडभान्स चिपहरू बनाउन आवश्यक पर्ने प्रमुख अमेरिकी प्रविधिबाट बन्चित गर्दछ।
एसएमआईसी चीनको सबैभन्दा ठूलो फाउण्ड्री हो जसले अन्य फर्महरूले डिजाइन गरेको चिप्स बनाउने गर्दछ। यो ताइवानको टीएसएमसी र दक्षिण कोरियाको सामसङको मनपर्ने प्रतिस्पर्धी हो तर एसएमआईसीको प्रविधि धेरै पुस्ता पछाडी रहेको छ।
पछिल्ला केही वर्षहरूमा चीन र अमेरिकाबीचको भूराजनीतिक तनाव बढ्दै गएकाले मुख्य प्रविधिहरूमा प्रभुत्व जमाउनको लागि उनीहरूको लडाइँ पनि बढेको छ। सेमिकण्डक्टर (अर्धचालक)हरू ती क्षेत्रहरू मध्ये एक हो।
चीन चिप उद्योगमा अमेरिकाभन्दा निकै पछाडि छ तर एसएमआईसीलाई यस क्षेत्रमा आत्मनिर्भरता बढाउन र विदेशी प्रविधिबाट आफूलाई छुटाउने आफ्नो महत्वाकांक्षाको प्रमुखको रूपमा हेरिन्छ।
प्रकाशित: १ फाल्गुन २०७८, आईतवार
