काठमाडौं ।
गत वर्षदेखि व्याँस गाउँपालिका–१, छाङ्गरुमा नियमित बसिरहेका सशस्त्र प्रहरी र नेपाल प्रहरीलाई सञ्चारमा समस्या हुने गरेको छ।
नेपाल सरकारले भारतले अतिक्रमित गरिराखेको कालापानी, लिपुलेक र लिम्पियाधुरासहितको भूमि समेटर नक्सा जारी गरेपछि छाङ्गरुमा सुरक्षाकर्मीको नियमित उपस्थित गराइएको हो ।
छाङ्गरुमा प्रहरी नियमित रुपमा बसे पनि उनीहरुका लागि प्रभावकारी सञ्चार साधनसमेत भने उपलब्ध छैन। छाङ्गरुका बासिन्दा आफ्नै गाउँमा बसुञ्जेल भायानेटमार्फत इन्टरनेट सुविधा रहेकोमा हाल उक्त सुविधा हटेको छ।
जाडो छल्न स्थानीयवासी गएको जेठमा सदरमुकाम खलङ्गा झरेपछि अहिले सुरक्षाकर्मीले भारतीय सञ्चारको भर पर्नुपरेको छ।
सशस्त्र प्रहरीका लागि नेपाल टेलिकमले दुई ओटा ल्यान्डलाइन फोन छुट्टै जडान गरिदिएको भए पनि हिमपात बढेपछि तिनीहरुले काम गर्न छोडेका छन्। त्यहाँ तैनाथ सुरक्षाकर्मीहरुका अनुसार माैसम सफा हुँदा मात्र ती फोनले काम गर्छन्।
यसरी सञ्चार सेवा भरपर्दो नभएपछि सुरक्षाकर्मीहरु खबर आदानप्रदानका लागि सीमा पारि रहेका भारतीय एसएसबीको क्याम्पसम्म पुग्नुपर्ने बाध्यता रहेको छाङ्गरुका बासिन्दाको भनाई छ।
स्थानीयका अनुसार विगतमा नेपालको सञ्चार सुविधा भारतीय सुरक्षाकर्मीले समेत प्रयोग गर्ने गरेकोमा अहिले अवस्था ठ्याक्कै उल्टिएको छ।
ल्यान्डलाइनसँगै व्याँसमा नेपाल टेलिकमको स्काइको टावर भए पनि नियमित चल्न नसकेको र दुई वर्षदेखि नमस्ते टावर छाङ्गरुमै निर्माणाधीन अवस्थामा रहेको पनि बताए। उक्त टावरमा उपकरण जडानमा ढिलाइ हुँदा व्याँसवासीले सञ्चार सेवाबाट वञ्चित हुनुपरेको स्थानीय निकायको भनाई छ।
प्रकाशित: २४ माघ २०७८, सोमबार
