‘क्रिप्टो स्क्याम’मा अमेरिकी टिभी स्टार किम कार्दशियन आरोपित, अन्य दुई खेलाडी पनि मुछिए

काठमाडौं ।

अमेरिकामा कथित क्रिप्टो स्क्याममा धेरै उच्च प्रोफाइलका सेलिब्रेटीहरू अनुसन्धानमा तानिएका छन्। यी सेलिब्रेटीहरू भर्खरै दायर गरिएको मुद्दामा कानूनी छानबिनको सामना गरिरहेका छन्।

जसमा रियालिटी टिभी स्टार किम कार्दशियन, अमेरिकी बक्सर फ्लोयड मेवेदर र एनबीए प्लेयर पल पियर्स समावेश भएको सीएनबीसीले उल्लेख गरेको छ।

इथेरियमम्याक्स (ईम्याक्स) नामक क्रिप्टोकरेन्सीको वरिपरि केन्द्रित रहेको पम्प र डम्प योजनामा ​​उनले कथित रूपमा भाग लिएको आरोप छ। यस क्रिप्टोकरेन्सीमा आफ्नो पैसा लगाउने लगानीकर्ताहरूले बढेको मूल्यमा आफ्नो पूँजी गुमाएको दाबी गरिएको छ।

यी सेलिब्रेटीहरूले अमेरिकी राज्यको उपभोक्ता संरक्षण कानूनको उल्लंघन गरेको आरोप छ। अनुसन्धानले त्यो ‘फाल्तु’ क्रिप्टोकरेन्सी टोकनलाई प्रवर्द्धन गर्न यी प्रतिष्ठित सेलिब्रेटीहरूको संलग्नता अन्वेषण गर्नेछ।

कम्पनीका कार्यकारीहरूले धेरै सेलिब्रेटी प्रमोटरहरूसँग सहकार्य गर्दै, सामाजिक सञ्जाल विज्ञापनहरू र अन्य प्रकारका प्रवर्द्धनहरूमार्फत इथेरियमम्याक्सको बारे लगानीकर्ताहरूलाई गलत जानकारी दिएको उजुरीमा भनिएको छ। यससँगै इथेरियमम्याक्समा उनीहरुको नियन्त्रणको विषयलाई पनि लुकाइएको थियो।

कार्दशियनले जुन २०२१ मा उनको इन्स्टाग्राम ह्यान्डलमा ईम्याक्सको बारेमा पोस्ट गरिन्। उनीसँग २७ करोड  भन्दा बढी फलोअरहरू छन्। यो पोष्ट इन्स्टाग्राम स्टोरीमा २४ घण्टा देखिएको थियो।

यस पोष्टका स्क्रिनसटहरू केसमा राखिएका छन्। कार्दशियनको पोस्टमा लेखिएको थियो, “के तपाई क्रिप्टोमा हुनुहुन्छ? यो आर्थिक सल्लाह होइन, तर मेरा साथीहरूले मलाई इथेरियमम्याक्स टोकनको बारेमा भनेका छन्।” कार्दशियनले उनको पोस्टमा स्वाइप-अप विकल्प पनि थपिन्। यसले इथेरियमम्याक्समा रुचि राख्नेहरूलाई ‘ईम्याक्स समुदायमा सामेल हुन’ सिधै रिडिरेक्ट गर्न सक्छ। पोष्टले ईम्याक्स टोकनको मूल्य १,३७० प्रतिशतले बढाएको मानिन्छ।

पूर्व एनबीए खेलाडी पल पियर्सले पनि मे २६ मा ट्विटरमा ईम्याक्स टोकनको प्रचार गरेका थिए। टोकनसँग सम्बन्धित लिङ्क साझा गर्दै, उनले लेखे, ‘@ESPN मलाई तपाइँको आवश्यकता छैन। मसँग @ethereum_max छ। मैले यो क्रिप्टोसँग गत महिनामा एक वर्षमा कमाएको भन्दा धेरै पैसा कमाएको छु।

यी हाई प्रोफाइल व्यक्तिहरूको प्रचार पछि, ईम्याक्स टोकनको मूल्य १५ जुलाई २०२१ मा ९८ प्रतिशतले घटेर ०.०००००००१७ अमेरिकी डलरमा पुग्यो।क्वाइनमार्केटक्यापको अनुसार, प्रत्येक ईम्याक्स टोकन हाल ०.०००००००१६ डलरमा व्यापार भइरहेको छ। यस टोकनको कुल बजार पूँजीकरण २ करोड ५६ लाख ७८ हजार ४३७ अमेरिकी डलर पुगेको छ।

हालसम्म कुनै पनि आरोपीले यस मुद्दामा कुनै टिप्पणी गरेका छैनन्। मुद्दा दायर गर्ने लगानीकर्ता समूहले आफूलाई भएको नोक्सानीको लागि क्षतिपूर्तिको माग गरेको छ।