एप्पलको सस्तो फाइभजी आईफोनले एक अर्ब एन्ड्रोइड प्रयोगकर्ताहरूलाई आकर्षित गर्ने

काठमाडौं ।

एप्पलले फाइभजी सपोर्टका साथ २०२२ को सुरुमा तेस्रो-पुस्ताको आईफोन एसई लन्च गर्ने चर्चा रहेको छ। जेपी मोर्गन विश्लेषकहरूका अनुसार यो फोनले “एक अर्बभन्दा बढी गैर-प्रिमियम एन्ड्रोइड प्रयोगकर्ताहरूलाई आकर्षित गर्ने क्षमता राख्छ।”

मिडिया रिपोर्टहरू र ब्रोकरेजका विश्लेषकहरूअनुसार एसई मोडेल थप्दा एप्पलले सामसङ इलेक्ट्रोनिक्स र ह्वावे टेक्नोलोजीज जस्ता प्रतिद्वन्द्वीहरूको प्रभुत्वमा रहेको मिड-रेन्ज स्मार्टफोन बजारलाई लक्षित गर्न अनुमति दिनेछ।

जे.पी. मोर्गनको विश्लेषणका अनुसार, आईफोन एसई ३ ले लगभग १.४ अर्ब लो इन्ड देखि मिड रेन्जको एन्ड्रोइड फोन र लगभग ३० करोड पुरानो आईफोन मोडेल प्रयोगकर्ताहरूलाई लोभ्याउने क्षमता छ।

“गैर-आईफोनहरूका लागि एप्पलको ट्रेड-इन कार्यक्रम आईफोन ट्रेड-इन मानहरू जत्तिकै आकर्षक छैन, यद्यपि यसले फाइभजी आईफोन एसईको लागि २६९ डलरदेखि  ३९९ डलरको औसत मूल्य दायरा निम्त्याउन सक्छ, जुन अझै पनि धेरै प्रतिस्पर्धी छ।” विश्लेषक सामिक चटर्जीले आफ्नो अनुमानमा उल्लेख गरेको रोयटर्सले जनाएको छ।

आईफोन १३ को लागि ७९९ र आईफोन १३ प्रोको लागि ९९९ डलरको तुलनामा आईफोन एसई हाल ३९९ डलर बजार मूल्यबाट सुरु हुन्छ।

सेप्टेम्बरमा आईफोन १३ दायरा र नयाँ आईप्याडहरू लन्च गरेदेखि, एप्पलले विश्वव्यापी चिपको अभाव र आपूर्ति श्रृंखला अवरोधहरूको सामना गर्न संघर्ष गरिरहेको छ।