काठमाडौं ।
सञ्चार तथा सूचना प्रविधि मन्त्रालय र अन्तर्गतका विभागमा एकीकृत कार्यालय व्यवस्थापन प्रणाली सञ्चालन गरिएको छ । कार्यालयको कामलाई छिटो, छरितो र पारदर्शी बनाउने गरी एकै प्रकृतिका कार्य एउटै सूचना प्रविधि प्रणालीमार्फत सञ्चालन गरिएको हो।
सूचना प्रविधि विभाग, मुद्रण विभाग, सूचना तथा प्रसारण विभाग, प्रमाणीकरण नियन्त्रणको कार्यालय र हुलाक सेवा विभागमा एकीकृत कार्यालय व्यवस्थापन प्रणाली सञ्चालन गरिएको छ।
सूचना प्रविधि विभागले गत साउनदेखि, सञ्चार तथा सूचना प्रविधि मन्त्रालयले गत असोज १ गतेदेखिर अन्य कार्यालयले यही मङ्सिर १ गतेदेखि एकीकृत कार्यालय व्यवस्थापन प्रणाली सञ्चालन गरेको सूचना प्रविधि विभागले जनाएको छ।
विभागका महानिर्देशक प्रेमशरण श्रेष्ठले सरकारी कार्यालयको कामलाई कागजातरहित विद्युतीय सेवामार्फत सुशासन अभिवृद्धि गर्नका लागि एकीकृत कार्यालय व्यवस्थापन प्रणाली सञ्चालन गरिएको जानकारी दिए ।
केही समयभित्र मन्त्रालयअन्तर्गतका अन्य कार्यालय र क्रमिक रूपमा सबै सरकारी कार्यालयमा एकीकृत कार्यालय व्यवस्थापन प्रणाली सञ्चालन गर्ने योजना विभागको छ।
यस प्रणालीमार्फत कार्यालयमा टिप्पणी, तोक आदेश दिने, दर्ता तथा चलानी, व्यवस्थित अभिलेख राख्ने, विद्युतीय हाजिर, बिदा, काजसम्बन्धी कार्य र सोको व्यवस्थापन गर्ने एउटै प्रकृतिका कार्य गर्ने व्यवस्था रहेको छ। त्यस्तै कार्यसम्पादन मूल्याङ्कन, पत्रको ढाँचा तयार गरी पत्र तयार गर्ने, नियुक्ति, काज सरुवा, रमाना र पदस्थापन गर्ने, कार्यान्वयन योजना तयार गर्ने, प्रगति विवरण भर्ने, प्रगति प्रतिवेदन तयार गर्ने, अनुगमन गर्ने कार्यसमेत कार्यान्वयनमा ल्याइनेछ।
समिति गठन र बैठक व्यवस्थापन गर्ने, कार्य सम्पादन करारसम्बन्धी कार्यसमेत गर्नका लागि विभागले नेपाल सरकारको एकीकृत कार्यालय व्यवस्थापन प्रणाली सञ्चालन तथा व्यवस्थापन निर्देशिका तयार गरेको छ।
उनले भने, “सरकारी निकायको कामलाई थप व्यवस्थित र प्रभावकारी तथा छिटो छरितो बनाउने उद्देश्यले अहिलेलाई सञ्चार तथा प्रविधि मन्त्रालय एवं अन्तर्गतका विभागमा र क्रमिक सबै सरकारी निकायको कामलाई एउटै सूचना प्रविधि प्रणालीमार्फत सञ्चालन गर्न लागिएको छ।”
महानिर्देशक श्रेष्ठले अन्तर्राष्ट्रिय स्तरमा पनि सबै कार्यालय एउटै विधिमा चल्ने गरिएको र नेपालमा पनि सोही प्रणाली सञ्चालन गर्न एकीकृत कार्यालय व्यवस्थान प्रणाली सञ्चालनमा ल्याइएको बताए। उनका अनुसार एउटै सूचना प्रविधि प्रणाली सञ्चालनका क्रममा विभागले सबै सरकारी कार्यालयलाई एड्मिन युजर र पासवर्ड प्रदान गरेको छ । सम्बन्धित निकायका प्राविधिक वा सम्बन्धित व्यक्तिद्वारा उक्त एड्मिन युजर र पासवर्ड प्रयोग गरी एकीकृत कार्यालय व्यवस्थान प्रणाली सञ्चालन गरिँदै आएको छ ।
उक्त सबै कार्य गर्नका लागि सरकारी कार्यालयका अधिकारीले विद्युतीय हस्ताक्षरको प्रयोग गर्नुपर्ने नेपाल सरकारको एकीकृत कार्य व्यवस्थापन प्रणाली सञ्चालन तथा व्यवस्थापनमा उल्लेख गरिएको छ।
मुद्रण विभागका सहायक प्रवक्ता विमला कोइरालाले मुद्रण विभागले राजपत्र, ई–हाजिरी, बिदा, काज स्वीकृत गर्नेलगायतका कतिपय प्रशासनिक कार्य विद्युतीय प्रणालीमा सुरु गरिसकेको बताइन्। “विभागले २००८ सालदेखि प्रकाशन गरेका सबै राजपत्र डिजिटलाइजेसन गरिसकेको छ,” उनले भनिन्, “डिजिटलाइजेसनको प्रक्रिया अलि लामो भए पनि व्यवस्थित र प्रभावकारी भएको छ ।” गोरखापत्रबाट
प्रकाशित: २७ मंसिर २०७८, सोमबार
