काठमाडौं ।
प्रदेश नं. २ मा मोबाईल बैंकिङ्ग प्रयोगकर्ता ९.६ प्रतिशत रहेका छन् । नेपाल राष्ट्र बैंकले सार्वजनिक गरेको अध्ययन प्रतिवेदनअनुसार आर्थिक वर्ष २०७७/७८ मा मोबाईल बैंकिङ्ग प्रयोगकर्ता सबैभन्दा बढी बागमती प्रदेशमा ३९.५ प्रतिशत र सबैभन्दा कम कर्णाली प्रदेशमा २.९ प्रतिशत रहेको छ।
प्रदेश नं. २ मा समीक्षा वर्षमा कुल वितरित मोबाइल फोन प्रयोगकर्ता संख्या १.१५ प्रतिशतले वृद्धि भई २१ लाख ४१ हजार ६ सय ६० पुगेको छ। गत वर्ष वितरित टेलिफोन संख्या १.३३ प्रतिशतले वृद्धि भई २१ लाख १७ हजार ३ सय ५ पुगेको थियो ।
कुल वितरित टेलिफोन संख्या मध्ये समीक्षा वर्षमा प्रदेश नं. २ मा नेपाल टेलिकमको वितरित टेलिफोनको संख्या २.८२ प्रतिशतले वृद्धि भई ११ लाख ७५ हजार १ सय ६२ पुगेको छ। त्यसैगरी, समीक्षा वर्षमा एनसेलद्वारा वितरित टेलिफोन संख्या ०.८१ प्रतिशतले कमी आई ९ लाख ६६ हजार ४ सय ९८ पुगेको छ । गतवर्षको सोही अवधिमा एनसेलद्धारा वितरित टेलिफोन संख्या ८.२९ प्रतिशतले वृद्धि भएको थियो ।
समीक्षा वर्षमा नेपाल टेलिकमद्धारा वितरित फिक्स्ड/ल्याण्डलाईन फोनमा ७.२८ प्रतिशतले कमी आई ३९ हजार २ सय ८० रहेको छ भने जिएसएम मोवाईल (प्रि–पेड/पोष्ट–पेड/सिडिएमए) संख्या २.८७ प्रतिशतले वृद्धि भई ११ लाख १९ हजार २ सय ४२ पुगेको छ।
त्यसैगरी, नेपल टेलिकमका अन्य सेवाहरुमा ३२.९५ प्रतिशतले वृद्धि भई १६ हजार ६ सय ४० पुगेको छ।
प्रकाशित: ७ मंसिर २०७८, मंगलवार
