कालापानी, लिपुलेक क्षेत्रमा जनगणना गर्न स्याटेलाइटको प्रयोग गरिने

काठमाडौं ।

बिहिबारदेखि शुरु हुने राष्ट्रिय जनगणनामा सरकारले कालापानी, लिपुलेक क्षेत्रमा स्याटेलाइटको सहयोगबाट जनगणना गरिने भएको छ।

केन्द्रीय तथ्यांक विभागले बुधबार आयोजना गरेको पत्रकार सम्मेलनमा ति क्षेत्रहरुमा भारतले जनगणना गर्न नदिएको खण्डमा नविनतम प्रविधिको प्रयोग गरेर तथ्यांक संकलन गरिने जानकारी दिएको हो।

‘मेरो गणना मेरो सहभागीता’ मूल नाराका साथ बिहीबारदेखि १२ औँ राष्ट्रिय जनजणना शुरु हुँदैछ।

विभागका महानिर्देशक नेविनलाल श्रेष्ठले नेपालको नक्सामा समेटिएको भूगोल लिपुलेक, लिम्पियाधुरा र कालापानीमा भारत सरकारले सहजरुपमा आवतजावत गर्न दिएको अवस्थामा भौतिकरुपमा उपस्थित भएर जनगणना गरिने बताए। त्यसरी सम्भव नभएको खण्डमा अन्य स्रोतहरुको प्रयोग गरेर जनगणना गरी सो क्षेत्रको अनुमानित विवरण प्रकाशन गरिनेछ।

उनकाअनुसार अहिले नविनतम प्रविधिको विकास राम्रो भएको हुँदा स्याटेलाइटको प्रयोग गरिकन ती क्षेत्रहरुमा कति घरधुरी छ भन्ने सजिलैसँग अनुमानहरु लगाउन सकिनेछ। एउटा घरमा औसत कति परिवार कति बस्दो रहेछ भन्ने विवरणहरु लिएर अनुमान सहितको रिपोर्ट प्रकाशित गर्ने उनको भनाई छ।

यस पटकको जनगणनामा काठमाडौँ महानगरपालिकासमेत काठमाडौँ जिल्लाका ६ नगरपालिकामा डिजिटल पद्दतिमा आधारित क्यापीविधि प्रयोग गरी ट्याब्लेटबाटै विवरण सङ्कलन गरिने छ भने देशभरका अन्य स्थानमा कागजी प्रश्नावली प्रयोग हुनेछ। काठमाडौँ जिल्लामा कुल २२ सय ५० वटा ट्याबलेट प्रयोग हुने बताईएको छ।

यसका साथै विदेशस्थित नेपाली कूटनीतिक नियोगहरुमा भने इ–सेन्सस विधि अपनाई वेबसाइट एप्लिकेशनबाट नेपाली कर्मचारी तथा आश्रित व्यक्तिको विवरण सङ्कलन गर्न लागिएको विभागले जनाएको छ।

जनगणनाका लागि विभागले ४० हजार जना गणक खटाउने भएको छ।