काठमाडौं ।
नेपाल दूरसञ्चार प्राधिकरणका कर्मचारीहरुले निर्वाचनमार्फत आफ्नो कर्मचारी यूनियन नेतृत्व ल्याउने भएका छन् । दूरसञ्चार प्राधिकरणका कर्मचारीहरुले यहि असोज १५ गते हुने चुनावमार्फत नयाँ नेतृत्व ल्याउने तयारीमा रहेका छन् ।
यसको लागि विजय कुमार राय यादव र शिवराज जैसीको नेतृत्वमा कर्मचारीहरु प्रतिस्पर्धामा उत्रिएका छन् । उनीहरु हाल आफू उम्मेदवार भएका समूहका लागि भोट माग्न व्यस्त रहेका छन् ।
यसअघिको प्राधिकरण कर्मचारी यूनियनले सामुहिक राजीनामा दिएसँगै निष्क्रिय रहेको दूरसञ्चार प्राधिकरणको स्वतन्त्र कर्मचारी युनियन २ वर्षपछि सक्रिय हुन लागेको हो ।
हाल दुबै नेतृत्वमा रहेका उम्मेदवारहरुले आ-आफ्नो उम्मेदवारी दर्ता गरेका निर्वाचन संयोजक मिन प्रसाद अर्यालले जानकारी दिए।
“हामी मतपत्रलाई अन्तिम रुप दिने कार्य गरिरहेका छौं उम्मेदवारहरुले आफ्नो उम्मेदवारी दर्ता गरिसकेका छन् र १५ गते चुनाव गर्न तयार छौं,” प्राधिकरणका निर्देशक तथा निर्वाचन संयोजक अर्यालले भने ।
यो निर्वाचनले दूरसञ्चार प्राधिकरणका कर्मचारीहरुले स्वतन्त्र कर्मचारी यूनियनको लागि नयाँ नेतृत्व दिनेछ। दूरसञ्चार प्राधिकरण स्वतन्त्र कर्मचारी यूनियनमा अध्यक्ष उपाध्यक्ष सचिव कोषाध्यक्षसहित ३* सदस्यको लागि प्रतिस्पर्धा हुँदैछ।
यूनियनका लागि हाल ५३ कर्मचारीहरुले मतदान गर्ने अपेक्षा गरिएको छ ।
* यसअघि २ भएकोमा सच्याईएको छ।
प्रकाशित: १४ आश्विन २०७८, बिहीबार
