Technology Khabar ३ आश्विन २०७८, आईतवार
काठमाडौं ।
मर्सिडिज-बेन्ज तथा भोल्भोजस्ता अटो निर्माता ब्रान्ड पनि विद्युतीय सवारी निर्माणमा जुटिरहेका बेला हालै यूरोपको फ्यूचरिकमसँग मिलेर निर्माण भएको इलेक्ट्रिक ट्रकले गिनिज बुकमा नाम लेखाएको छ।
यूरोपको व्यावसायिक ब्रान्ड फ्यूचरिकमसँगले भोल्भो र मर्सिडिज बेन्जसँगको सहकार्यमा बनाएको विद्युतीय ट्रकले एक पटकको चार्जमा सबैभन्दा धेरै अर्थात् १०९९ किमीको यात्रा गरेर विश्व रेकर्ड कायम गरेको हो।
फ्युचरिकम एक व्यावसायिक सवारी ब्रान्ड हो जसले इलेक्ट्रिक ट्रकहरुको विकास तथा निर्माणका लागि स्विजरल्यान्डको डीपीडी तथा कन्टिनेन्टल टायर्ससँग साझेदारी गरेको छ।
यो रेकर्डको परीक्षणका लागि निर्माता कम्पनीहरुले विगत ६ महिनादेखि सामान ओसारपसार गरिरहेको एउटा ई-ट्रकलाई छानेका थिए।
यो ट्रकलाई भोल्भोले पहिले मोडिफाइ गरेर इलेक्ट्रिक ट्रक बनाएको र यसले सिंगल चार्जमा १०९९ किमी को दूरी नरोकिइकन पार गरेको हो।
२३ घण्टा मा ३९२ ल्याप पूरा
यो इलेक्ट्रिक ट्रकलाई परीक्षणका क्रममा कन्टिनेन्टलको इन-हाउस टेस्ट सेन्टर, कन्टिड्रोममा २.८ किमी किमी लामो अण्डाकार टेस्ट ट्र्याकमा चलाइएको थियो।
दुई ड्राइभरले यो ट्रक चलाउँदा २३ घन्टामा उक्त परीक्षण ट्र्याकमा ३९२ ल्याप पूरा गरेका थिए। ट्रकको औसत गति ५० किमी प्रति घन्टा रहेको थियो। यो ई-ट्रकले प्रत्येक दिन ३०० किमीको दूरी तय गर्न सक्ने बताइएको छ।
ट्रकमा ६८० किलोवाट प्रति घण्टाको ब्याट्री क्षमता
डीपीडी स्विजरल्यान्डको स्ट्राटेजी तथा इनोभेशन डाइरेक्टर मार्क फ्र्यांकले कम्पनीले शुरुआती चरणमा इलेक्ट्रिक मोबिलिटीमा लगानी गर्ने निर्णय लिएको बताए।
फ्यूचरिकम ब्रान्डमा काम गर्ने कम्पनी डिजाइन वर्क प्रडक्ट्स एजीका सीईओ एड्रियन मेलिगरले यो इलेक्ट्रिक ट्रकमा ६८० किलोवाट प्रति घण्टा क्षमताको ब्याट्री राखिएको र यो यूरोपकै सबैभन्दा ठूलो क्षमताको ट्रक ब्याट्री भएको दावी गरे।
१९ टन तोल भएको यो ट्रकमा ६८० हर्सपावरभन्दा बढीको बिजुली उत्पादन हुन्छ।
एजेन्सीका साथमा
प्रकाशित: ३ आश्विन २०७८, आईतवार
