क्यूआर कोडसहितको खोप लगाएको प्रमाणपत्र अनलाइनबाटै लिन सकिने

काठमाडौं ।

अब क्यूआर कोडसहितको खोप लगाएको प्रमाणपत्र अनलाइनबाटै लिन सकिने भएको छ । स्वास्थ्य तथा जनसंख्या मन्त्रालयले एक विज्ञप्ति जारी गर्दै क्यूआर कोडसहितको खोप प्रमाणपत्र अनलाइनबाटै आवेदन दिन र अनलाइनबाटै प्रमाणपत्र लिन सकिने भएको जानकारी दिएको छ।

कतिपय देशहरुले क्यूआर कोडसहितको खोप प्रमाणीकरणलाई मात्रै मान्यता दिने गरेको सन्दर्भमा अब मन्त्रालयको अनलाइन सेवाबाटै क्यूआर कोडसहितको खोप लगाएको प्रमाणपत्र लिन मिल्ने व्यवस्था गरेको हो।

स्वास्थ्य तथा जनसंख्या मन्त्रालयको https://vaccine.mohp.gov.np/public-request-form अनलाइन प्रणालीमार्फत खोप लगाएको विवरण प्रविष्टि गरी आवश्यक कागजात अपलोड गरी प्रमाणपत्र लिन सकिने छ।

सो अनलाइन फाराममा प्रमाणपत्र लिन चाहेको व्यक्तिले खोप कार्ड, राहदानी नम्बर अनलाइन फर्ममा रहेको कबुलियतनामा लगायतका बिबरणहरु अपलोड गर्नुपर्ने मन्त्रालयले जनाएको छ।

अपलोड भएपछि उल्लेखित कागजात स्वास्थ्य सेवा विभाग, परिवार कल्याण महाशाखाको अनलाइन प्रणालीबाटै स्वतःभेरिफाई हुनेछ। र यस्तो प्रमाणपत्र निशुल्क उपलब्ध हुने सूचनामा उल्लेख छ ।

यस विषयमा कुनै समस्या भएमा नजिकको स्वास्थ्य संस्था वा स्वास्थ्य सेवा विभागमा सम्पर्क गर्न अनुरोध गरिएको छ।

यसअघि सरकारले विदेश जानेहरूको लागि टेकु अस्पतालबाट प्रमाणीकरण गरिँदै आएको थियो। त्यसपछि भने वैदेशिक रोजगारमा जानेहरुका लागि कीर्तिपूरस्थित आयुर्वेद अस्पतालमा व्यवस्था गरेको थियो।

यसका साथै उपत्यका बाहिरको हकमा ५० शय्याभन्दा माथिका सरकारी अस्पतालहरूबाट समेत खोप प्रमाणीकरण गर्ने व्यवस्था रहेको मन्त्रालयले जनाएको छ।