काठमाडौं ।
पूर्वी नवलपरासीको मध्यबिन्दु नगरपालिकामा अनलाइनमार्फत राजस्व सङ्कलन सुरु गरिएको छ ।
नगरपालिका प्रमुख चन्द्रबहादुर रानाले मध्यबिन्दु नगरपालिका–१५ का देशबहादुर गुरुङको अनलाइन प्रणालीबाट सम्पत्ति कर भुक्तानी गर्दै विद्युतीय भुक्तानी प्रणालीको सुरुवात गरेका हुन् ।
तत्कालका लागि सम्पत्ति तथा भूमि कर, व्यवसाय कर र बहाल कर यो प्रणालीबाट भुक्तानी सुरु गरिएको छ । नगरवासीलाई कर भुक्तानीका लागि नगरपालिका वा सम्बन्धित वडा कार्यालय पुग्नुपर्दैन् ।
विद्युतीय भुक्तानी सुरु भएपछि करदाताले घरबाटै राजस्व भुक्तानी गर्नसक्ने नगरप्रमुख रानाले बताए । अनलाइन भुक्तानी प्रणालीले राजस्व भुक्तानीमा सेवाग्राहीको सहभागिता र राजस्वको दायरा वृद्धि गर्ने नगरप्रमुख रानाको विश्वास छ ।
तत्काल ई–सेवा प्रयोगकर्ताले नगरपालिकाको वेबसाइटमार्फत अनलाइनबाट कर भुक्तानी गर्नसक्ने मध्यबिन्दु नगरपालिका आईटी शाखाका नरेश गुरुङले बताए । गोरखापत्र
प्रकाशित: १२ श्रावण २०७८, मंगलवार
