दूरसञ्चार सेवाहरु अपाङ्गता भएका व्यक्तिहरुको पहुँचमा भए नभएको अध्ययन गरिने

काठमाडौं ।

नेपाल दूरसञ्चार प्राधिकरणले नेपालभरका दूरसञ्चार तथा सूचना प्रविधि सेवालाई अपाङ्गतामैत्री बनाउने भएको छ । प्राधिकरणले चालु आव २०७८/७९ को बजेटमा अपाङ्गतामैत्री सेवाहरु भए नभएको अध्ययन गरेर त्यसमा काम अगाडि बढाउने भएको छ ।

प्राधिकरणको बजेट योजनाअनुसार चालु आवमा अपांगता भएका व्यक्तिहरुको पहुँचमा दूरसञ्चार तथा सूचना प्रविधि सेवा भए नभएको अध्ययन गरेर त्यसलाई आवश्यकताअनुसार परिवर्तन गर्न रकम बिनियोजन गरेको छ ।

जसअनुसार परामर्शदातामार्फत आवश्यकताको विश्लेषण गरिनेछ भने सो प्रतिवेदनको आधारमा आवश्यकताहरु पहिचान गरेर अपांगता भएका व्यक्तिहरुलाई सूचना प्रविधि प्रदान गर्ने कार्य गरिहेका संस्थाहरुलाई सहयोग गर्ने भएको छ ।

यसको लागि प्राधिकरणले चालु आवमा ८० लाख रुपैयाँ बजेट उपलब्ध गराएको छ ।

यसले अपांगता भएका व्यक्तिहरु र विशेष आवश्यकता पहिचान भई आधारभूत आवश्यकताको रुपमा सूचना प्रबिधिको पहुँच पुर्याउन सकिने प्राधिकरणको लक्ष्य रहेको छ ।