Technology Khabar १० श्रावण २०७८, आईतवार
काठमाडौं ।
अनलाइन सञ्चारमाध्यम दर्ता तथा नवीकरणसहितका कार्यहरु आजदेखि अनलाइनमार्फत नै गराउन सकिने भएको छ।
सूचना तथा प्रशारण विभागले नयाँ प्रेस प्रतिनिधि प्रमाणपत्र, अध्यक्ष तथा प्रकाशकहरुको परिचयपत्र, प्रेस प्रतिनिधि प्रमाणपत्र नवीकरणको कार्य र अनलाइन सञ्चारमाध्यम दर्ता तथा नवीकरणका लागि अनलाइनबाटै निवेदन दिन सकिने सेवा आजदेखि शुरु गरेको हो ।
विभागले बिहीबार एक विज्ञप्ती जारी गर्दै नयाँ प्रेस प्रतिनिधि प्रमाणपत्र, अध्यक्ष तथा प्रकाशकहरुको परिचयपत्र, प्रेस प्रतिनिधि प्रमाणपत्र नवीकरण र अनलाइन सञ्चारमाध्यम दर्ता तथा नवीकरण कार्यहरुको सेवा प्रवाह अनलाइनबाट हुने व्यवस्था मिलाईएको छ ।
सेवाग्राहीहरुले साउन १० गते आईतबारदेखि आवश्यक कागजातसहित सूचना तथा प्रसारण विभागको वेबसाइटबाट आवेदन दिन सकिने छ र यसको लागि विभागले तयार पारेको वेबसाइट http://202.45.146.61/pressinfo/publicview मा आवेदन दिन अनुरोध गरेको छ ।
अनलाइनबाट आवश्यक कागजातसहित प्रक्रिया पुरा गरी निवेदन दिएका सेवाग्राहीहरूले प्रेस प्रतिनिधि प्रमाणपत्र र अनलाइन सञ्चार माध्यम प्रमाणपत्र काठमाडौं उपत्यकाको हकमा भोलिपल्ट उपलब्ध गराइने विभागले जनाएको छ।
उपत्यका बाहिरका सेवाग्राहीको हकमा अनुकुलता र माग अनुसार विभाग वा सम्बन्धित जिल्ला जिल्ला हुलाक कार्यालयबाट उपलब्ध गराउने व्यवस्था गरिने विभागले जनाएको छ।
यस्तो छ अनलाइन सेवा लिने तरिका
अनलाइनबाटै प्रेस पाउन, नवीकरण गर्न तथा अनलाइन मिडिया दर्ता गर्न र नवीकरण गर्न शुरूमा सूचना व्यवस्थापन प्रणालीमा क्लिक गर्नुपर्नेछ । त्यसपछि त्यहाँ ३ वटा विकल्प देखिने छन् ।
आफुले कुन सेवा लिन चाहेको हो उक्त विकल्पमा छनोट गर्नुपर्छ । यदी प्रेस पास लिन वा नवीकरण गर्न चाहनुहुन्छ भने रजिष्टर फर प्रेस पास (जर्नालिष्ट) मा जानुहोस् ।
त्यसपछि त्यहाँ रजिष्टर टाइपमा गएर नयाँ लिने वा नवीकरण गर्ने भनेर छनोट गर्नसकिन्छ । यति गरेपछि त्यहाँ माग भए अनुसार आफ्नो विवरणहरु राखेर प्रेस पासका लागि आवेदन दिन सकिने छ।
त्यस्तै अनलाइन मिडिया दर्ता वा नवीकरण गर्नका लागि रजिष्टर अनलाइन मिडिया अप्सनमा क्लिक गर्नुहोस् ।
त्यसपछि त्यहाँ रजिष्ट्रेसन टाइपमा गएर नयाँ अनलाइन मिडिया दर्ता गर्ने वा नवीकरण गर्ने त्यसअनुसार छनोट गर्नुहोस् । अनि त्यहाँ माग भएअनुसार आवश्यक विवरण राखेर अनलाइन मिडिया दर्ता गर्न वा नवीकरण गर्न सकिने छ। यसको लागि आवश्यक कागजातहरु अनलाइनमै अपलोड गर्ने अप्सन समेत दिईएको छ ।
त्यसैगरी त्यहाँ अनलाइन पोर्टल भन्ने अर्को अप्सन रहेको छ, जसबाट मिडियाहरुले आफ्नो कार्यालयको दरबन्दी र श्रम विवरणहरु विभागमा पठाउन सकिन्छ ।
साथै सूचना तथा प्रसारण विभागले त्यहाँ युजर म्यानुअल पनि राखेको छ, जसबाट पनि माथिका यी अनलाइन सेवा कसरी प्रयोग गर्न सकिन्छ भनेर थाहा पाउन सकिन्छ ।
तपाईँले दर्ता गरेको बिवरणहरु प्रिन्ट समेत गर्न सकिनेछ भने सबमिसन नम्बर सुरक्षित राखेर पछि हेर्न समेत सकिन्छ ।
प्रकाशित: १० श्रावण २०७८, आईतवार
