ईआरपी प्रणालीमा निगमः खर्च कम र लाभ बढी हुने दाबी

काठमाडौं ।

नेपाल आयल निगमले अनलाइन प्रणालीबाट सेवा सुरु गरेको छ । निगमले इन्टरप्राइज रिसोर्स प्लानिङ (ईआरपी) प्रणाली लागू गरेर आफ्ना सेवा अनलाइनबाट दिन सुरु गरेको हो । करिब तीन महिनाको परीक्षणपछि सोमबारदेखि पूर्ण रूपमा अनलाइनबाट काम सुरु भएको छ । आफ्ना सम्पूर्ण सेवालाई कागजविहीन बनाएको छ।

सेवा प्रवाह, अनुगमन तथा नियमन र निगमलाई काजगविहीन बनाएर प्रभावकारी काम गर्न ईआरपी लागू गरिएको निगमका प्रवक्ता विनितमणि उपाध्यायले जानकारी दिए। पेट्रोलीयम पदार्थको ढुवानीका क्रममा हुने चुहावट तथा प्राविधिक नोक्सानीलाई न्यूनीकरण गर्न पनि निगमले ईआरपी प्रणालीबाट काम गरेको हो ।

यो सफ्टवेयरमार्फत स्वचालित प्रणाली हो । निगमका सम्पूर्ण कार्यलाई विद्युतीय (डिजिटलाइज) प्रणालीमा लगिएको छ।

ईआरपी प्रणालीअन्तर्गत निगमले पेट्रोलीयम पदार्थ ढुवानी गर्ने ट्याङ्करहरूलाई इलेक्ट्रोनिक कार्गो ट्र्याकिङ सिस्टम (ईसीटीएस) बाट जीपीएस प्रणालीमा लैजाँदैछ। यसबाट पेट्रोलीयम पदार्थ ढुवानी गर्ने ट्याङ्करको लोडदेखि अनलोडसम्मको रुटमा अनलाइन निगरानी हुनेछ ।

ट्याङ्करको रुट, समय तथा यात्राको रेकर्ड निगरानी हुनेछ । भारतबाट पेट्रोलीयम पदार्थ भरेर नेपाल आउने ट्याङ्करलाई पनि यही प्रविधिमा समेटेर निगरानी गरिने छ । ढुवानीमा रहेका ट्याङ्करलाई प्रत्यक्ष निगरानी गरिने भएकाले चुहावट र मिसावट नियन्त्रण हुने प्रवक्ता उपाध्यायको दाबी छ ।

तथ्याङ्क राख्ने, डेलिभरी, अडर र भुक्तानीको काम अनलाइनबाट गरिएको छ । ईआपी प्रणालीमा जान निगमले २५ करोड रुपियाँ खर्चेको छ । निगमका अनुसार ईआरपी प्रणालीले दैनिक काम व्यवस्थित हुनेछ । वित्तीय सुशासन प्रभावकारी हुनुका साथै छिटोछरितो र प्रभावकारी सेवा प्रवाह हुनेछ ।

प्रवक्ता उपाध्यायले निगमका सबै गतिविधिलाई डिजिटलाइज गरी वैज्ञानिक तरिकारले जाँच र अनुगमन हुने बताए । प्रविधिमैत्री र पारदर्शी भएर प्रभावकारी सेवा दिन ईआरपी उपयुक्त रहेको पनि उनले बताए।

तीन वर्षअघि एकल ताला प्रणाली लागू गरेर पुरानो प्रविधिको लिड सिल विस्थापित गरे पनि निगमले पूर्ण सफलता पाउन सकेन । प्रवक्ता उपाध्यायले एकल ताला प्रणाली लागू भएपछि धेरै हदसम्म चोरी, मिसावट रोकिएको थियो भन्दै एकाध घटना भइरहेको तर बदमासी गर्नेहरू उम्कन भने नपाएको जनाए । अब नयाँ प्रविधिले ती सबै समस्या अन्त्य हुने दाबी पनि उनले गरे।

ईआरपी प्रणाली विश्वमा अधिकांश इन्धन उत्पादक तथा वितरक कम्पनीहरूले प्रयोग गर्दै आएको विश्वसनीय प्रविधि भएको निगमले जनाएको छ। यसले नेपालको पेट्रोलियम पदार्थको बजार व्यवस्थित गर्ने दाबी गरिएको छ। इन्डियन आयल कर्पोरसनले पनि ईआरपी प्रणालीबाट काम गर्छ।

ईआरपी जडानले निगमको खर्च घट्नुका साथै आम्दानी बढ्ने दाबी गरिएको छ । उपाध्यायका अनुसार अनावश्यक खर्च तथा जनशक्तिको व्यवस्थापन हुन्छ । अनलाइनमा काम भएपछि जनशक्तिको आवश्यकता कम हुनेछ ।

त्यसका लागि निगमले सङ्गठन संरचना र दरबन्दीलाई समयानुकूल पुनरवलोकन गर्ने भएको छ । साथै निगमलाई चुस्त र समयानुकूल बनाउन वस्तुपरक स्वैच्छिक अवकाशको योजना लागू गरिने भएको छ ।

ईआरपी प्रणालीबाटै निगमका देशभरका प्रादेशिक कार्यालय, डिपो र विभागको दैनिक काम कारबाही एकीकृत सूचना प्रणालीमा आएका छन् ।

एकै स्थानबाट निगरानी र निर्देशन भएको छ। यसबाट प्रशासनभित्रको बेथिति र ढिलासुस्ती रोकिने निगमले जनाएको छ। गोरखापत्रबाट