सरकारी विद्यालयमा प्रोजेक्टरमार्फत पढाउने तयारी

काठमाडौं ।

कालीकोट जिल्लाको शुभकालिका गाउँपालिकाले सबै विद्यालयमा प्रोजेक्टरमार्फत पढाउने व्यवस्था मिलाइएको छ। गाउँपालिकाले वडा नं १ देखि ८ सम्म रहेका सम्पूर्ण विद्यालयलाई प्रविधिमैत्री बनाइ प्रोजेक्टरमार्फत पढाउने तयारी गरेको हो ।

गाउँपालिकामा प्राप्त विशेष अनुदानअन्तर्गत प्रविधि मैत्री शिक्षा योजनाबाट पालिकाभित्रका सबै २६ वटा विद्यालयमा ल्यापटप, पेन ड्राइभ, प्रोजेक्टर, प्रिन्टर हस्तान्तरण गरिएको छ।

गाउँपालिकाले पालिकाका सबै विद्यालयका प्रधानाध्यापक तथा विद्यालय सञ्चालक समितिका सदस्य र शिक्षकलाई एकसाथ राखेर आवश्यक निर्देशनसहित सबै सामान सोमबार विद्यालयलाई हस्तान्तरण गरिएको छ ।

बर्सातको समयमा सडक अवरोध भएकाले गाउँपालिकाको वडा नं २ को शेरीघाटमा सबैलाई भेला पारेर विद्यालयलाई प्रविधि मैत्री बनाउन आवश्यक सबै सामग्री हस्तान्तरण गरिएको छ।

शुभकालिका गाउँपालिका अध्यक्ष खडानन्द चौलागाईले अनलाइन कक्षा, र अनलाइन मैत्री सेवा प्रवाहकालागि विद्यालयका कामकाजहरू कम्प्यूटरको माध्यमबाट गर्न र विद्यार्थीको पढाइ प्रोजेक्टर माध्यमबाट सञ्चालन गर्न जिल्लाका २६ वटा विद्यालयलाई कम्प्युटर, प्रिन्टरलगायतका अन्य प्रविधिहरू हस्तान्तरण गरिएको बताए।

विद्यालयका भौतिक पूर्वाधारमा पनि उल्लेख्य सुधार ल्याएको गाउँपालिकाको दाबी छ । नयाँ भवन, खेलमैदान, छात्र, छात्राका लागि अलग–अलग शौचालयसहितका भौतिक पूर्वाधार सुधारका काम पनि भएका छन् ।

गाउँपालिकाका स्रोत व्यक्ति पुष्पराज आचार्यले शुभकालिका गाउँपालिकाको पहलमा सामग्री हस्तान्तरण गरिएको बताए । बालबालिका तथा शिक्षाको क्षेत्रमा काम गरिरहेको किर्डाक नेपाल कालीकोटका जिल्ला संयोजक तुलाराम पाण्डेले शैक्षिक सुधारमा शुभकालिकाले थालेको अभियान नमूनायोग्य रहेको बताए ।

विद्यालयहरूलाई ल्यापटप ५८ थान, डेस्टप कम्प्यूटर २० थान, प्रिन्टर २५ थान, प्रोजेक्टर ५५ थान, पेनड्राइभ ३० थान हस्तान्तरण गरिएको उनले जानकारी दिए । गोरखापत्र