भारतको दिल्लीमा लकडाउन भएसँगै इकमर्स कम्पनीहरुले अत्यावश्यक सामाग्री मात्र डेलिभरी दिने

काठमाडौं ।

भारतीय इकमर्स कम्पनीहरु अमेजन र फ्लिपकार्टले भारतको राजधानी दिल्लीमा कोरोना भाइरस महामारीको कारण लगाइएको लकडाउनपछि अत्यावश्यक नभएका वस्तुहरू वितरण नगर्ने निर्णय गरेका छन्।

दिल्ली सरकारले सोमबार रातीदेखि पूरै लकडाउन लागू गरिसकेको छ। यस निर्णयका कारण अब ई कमर्स वेबसाइटहरूले अत्यावश्यक नभएका वस्तुहरूको वितरणलाई स्थगित गरेका भारतीय मिडियाहरुले जनाएका छन्।

यद्यपि कम्पनीहरुले अझै आवश्यक सामानहरू पुर्‍याइरहेका छन्, जस्तै किराना उत्पादनहरू, स्वास्थ्य उत्पादनहरू र व्यक्तिगत हेरचाह आइटमहरू, इत्यादि।

भर्खरै, फ्लिपकार्ट र अमेजनले महाराष्ट्रमा अत्यावश्यक नभएका सामाग्री तथा सेवाहरुको लागि अर्डर क्यान्सिल गरेका थिए, जसको केही दिन पछि अमेजन र फ्लिपकार्टले दिल्लीमा पनि यस्तै कदम चालेका हुन्।

दिल्लीमा सोमबार रातीदेखि पुर्णरुपमा लकडाउनको घोषणा गरिएको छ र यो अप्रिल २६ तारिखसम्म चल्नेछ।

अत्यावश्यक नभएका सामाग्रीहरुको आदेशहरूको डेलिभरीको बारेमा अमेजनले आफ्नो वेबसाइट मार्फत जानकारी दिएकोछ। इ(कमर्स कम्पनीले आफ्नो वेबसाइटमा एक ब्यानर राखेको छ, जसमा भनिएको छ ‘भर्खरका सरकारी दिशानिर्देशहरूलाई ध्यानमा राख्दै हामीले केवल आवश्यक उत्पादनहरूको लागि अर्डर लिइरहेका छौं। वितरणले सामान्य भन्दा बढी समय लिन सक्दछ।’

ग्राहकहरूले अत्यावश्यक नभएका उत्पादन  सामाग्रीहरुको प्रोडक्ट सूचीकरणमा पनि म्यासेज प्राप्त गरिरहेका छन्, जसमा इलेक्ट्रोनिक उपकरणहरू र घरेलू उपकरणहरू जस्ता उत्पादनहरू समावेश छन्। म्यासेजमा भनिएको छ- यी उत्पादनहरूको डेलिभरी हाल चयन गरिएको स्थानमा भइरहेको छैन।

फ्लिपकार्टले आफ्नो वेबसाइटमा कुनै ब्यानर जानकारी नदिएपनि मोबाइल एपमार्फत सो बारेमा ग्राहकहरुलाई सूचित गरेको छ ।