काठमाडौं ।
मङ्गल ग्रहमा सफलतापूर्बक अवतरणपछि अमेरिकी अन्तरिक्ष संस्था (नासा) को पर्सेभेरेन्स रोभरले कहिल्यै नदेखिएको दृश्यसहितको तस्विरहरु पठाएको छ । उक्त रोभर अवतरणस्थलको आफ्नो पोष्टकार्ड समेत पठाएको छ ।
पर्सेभेरेन्सले ट्विटर खाताबाट सेयर गरिएको टवीटमा लेखिएको छ, “यो तस्विर मेरो पाङ्ग्राले सतह छुँदा जेटप्याकमा जडान गरिएको क्यामराको हो । यो क्षणका लागि मेरो टोलीले वर्षौंदेखि सपना देखेको छ तर अब वास्तविकतामा परिणत भएको छ ।”
The moment that my team dreamed of for years, now a reality. Dare mighty things. #CountdownToMars pic.twitter.com/8SgV53S9KG
— NASA's Perseverance Mars Rover (@NASAPersevere) February 19, 2021
उक्त रोभर मङ्गलको सतहभन्दा करिब साढे छ फिट माथि हुँदा केही मात्रामा धुलो उडेको देखिएको छ । यसभन्दा अघिको मिसनहरुमा भने रोभरले हाल पठाएको जस्तै तस्विर सम्भव भएको थिएन ।
रोभरले पठाएको अर्को तस्विरमा मङ्गल ग्रहको चट्टानहरुमा प्वाल देखिएको छ । वैज्ञानिकहरुले चट्टानमा प्वाल हुनुको कारण बुझ्न उत्सुक देखिएका छन् ।
रोभरका नीति ब्यवस्थापक पौलिन हवाङ्गले मङ्गलमा अवतरण गरेको रोभर स्वस्थ्य अवस्थामा राम्रोसँग काम गरिरहेको बताएकाछन् । मङ्गल ग्रह मिसनमा रोभरका उप परियोजना प्रमुख क्याटि स्टक मोर्गनको नेतृत्वमा चार सय ५० जना वैज्ञानिकहरुको टोलि परिचालन गरिएको छ । एजेन्सीका साथ
प्रकाशित: १० फाल्गुन २०७७, सोमबार
