Technology Khabar २१ मंसिर २०७७, आईतवार
काठमाडौं ।
फोरजी नै देशभर पुग्न नसकेको अवस्थामा नेपाल दूरसञ्चार प्राधिकरणले गठन गरेको समितिले फाईभजीको लागि फ्रिक्वेन्सी सिफारिस गरेको छ।
विश्वभर फाइभजीको लहर चलिरहेको भएपनि नेपालमा मोबाइल सेवा प्रदायकहरुले भनेअनुसार देशभर फोरजी बिस्तार गर्न सकेका छैनन्।
प्राधिकरण अन्तरगत गठित राष्ट्रिय फ्रिक्वेन्सी व्यवस्थापन फोरमले फाइभजीका लागि फ्रिक्वेन्सी सिफारिस गरेको हो ।
सो फोरममा प्राधिकरणकै बोर्ड सदस्य सि. मणि चौलागाईंको संयोजकत्वमा रहेको फोरममा प्राधिकरणका वरिष्ठ निर्देशक आनन्दराज खनाल, फ्रिक्वेन्सी महाशाखाका निर्देशक अम्बर स्थापित, उपनिर्देशक प्रदीप पौडेलका साथै एनसेल र नेपाल टेलिकमका प्रतिनिधि सदस्य रहेका छन् ।
सोहि समितिले फाइभजीको लागि फ्रिक्वेन्सी सिफारिस गरेको हो ।
समितिले न्यून ब्यान्डअन्तर्गतका सात सय, नौ सय, १८ सय, २३ सय, २६ सय मेगाहर्ज, मध्यम ब्यान्डका ३३ सय, ३४ सय, ३६ सय, ४७ सय मेगाहर्ज र उच्च ब्यान्डको २६ गिगाहर्ज ब्यान्ड सिफारिस गरेको छ।
सेवा प्रदायकहरुलाई न्यून फ्रिक्वेन्सी ब्यान्डहरूमा १० देखि २० मेगाहर्ज, मध्यम ब्यान्डअन्तर्गत एक सय मेगाहर्जसम्म र उच्च ब्यान्डमा एक हजार मेगाहर्जसम्म फ्रिक्वेन्सी दिन फोरमको सिफारिस गरेको छ।
यसअघि नै फोरमका संयोजक चौलागाईँले एक कार्यक्रममा २०२० भित्रै ५जी परीक्षण गरिने योजना रहेको र त्यसको लागि सरकारले समेत अनुमति दिने बताएका थिए ।
उनले ५जीको लागि ७०० मेगाहर्ज ब्याण्ड र २.६ मेगाहर्ज ब्याण्ड उपलब्ध गराउने बताएका थिए ।
सन् २०२० भित्रै ५जी नेटवर्क परीक्षण गरिने, आठ वर्ष भित्र ७० प्रतिशत जनसंख्यामा ५जी पुर्याईने
अहिलेको सिफारिस पनि सरकारको रेडियो फ्रिक्वेन्सी समितिमा जाने र त्यसपछि सो समितिले अनुमति दिएपछि मात्र उपयोगमा आउनेछ ।
तर समितिकै एक सदस्यले भने हालको सिफारिसको कुनै अर्थ नरहेको बताए ।
‘अहिले देशभर फोरजी सेवा नै नपुगेको अवस्थामा फाइभजीको लागि सिफारिस गर्नुको कुनै तुक छैन्,’ नाम उल्लेख नगर्ने शर्तमा उनले भने, ‘फोरजीको बिस्तार गर्दा भएको आम्दानी नै नउठेको बेलामा फाइभजीको लागत कसरी उठला भन्ने छ त्यसैले नेपालमा तत्काल आउने संभावना पनि छैन् ।’
अहिलेको फाइभजीको फ्रिक्वेन्सी सिफारिस भनेको कामको लागि काम मात्र भएको उनको भनाई थियो।
एनसेलले अक्सनमार्फत पाएको फ्रिक्वेन्सी फोरजी सेवाको बिस्तारमा प्रयोग गरिरहेको छ भने हालै नेपाल टेलिकमले पाएको फ्रिक्वेन्सी पनि फोरजीको लागि बिस्तार गरिरहेको छ। दुबै कम्पनीले अझै थप स्थानहरुमा तिब्रगतिमा फोरजी बिस्तार गर्नुपर्नेछ।
छिमेकी मुलुक भारतमा समेत फाइभजीका लागि सरकारले फ्रिक्वेन्सी छुट्याउन सकेको छैन् भने चीनमा यसअघि नै फाइभजी सेवा उपलब्ध रहेको छ।
नेपाल टेलिकमले फोरजी सेवा बिस्तार सकेसँगै फाइभजी सेवा समेत परीक्षण गर्नेगरि ह्वावेसँग सम्झौता गरेको थियो । तर १ वर्षभन्दा बढि समय भईसक्दापनि फोरजी बिस्तारको कार्य सुस्त रहेको छ भने फोरजी देशभर पुग्न सकेको छैन् ।
हालै सार्वजनिक एरिक्सनको तथ्यांकले भने सन् २०२६ मा भारत नेपाल र भुटानगरि संयुक्तरुपमा ३५ करोड ५जीका सेवाग्राही हुने प्रक्षेपण गरेको छ जसमध्ये अधिकतम भारतका ग्राहक हुनेछन् ।
प्रकाशित: २१ मंसिर २०७७, आईतवार
