५५ हजार रुपैयाँ पर्ने १ टेराबाइटको एसडी कार्ड, ५०० घण्टाको भिडियो स्टोर गर्ने

काठमाडौं ।

काठमाडौं । अधिकांश मानिसहरुले आफ्नो डाटा स्टोर गरेर एक ठाउँबाट अर्को ठाउँमा लान पोर्टेबल डाटा स्टोरेजको प्रयोग गर्ने गर्दछन् । त्यस्तै विभिन्न डिभाइसहरुमा आफूले चाहेअनुसारको माइक्रो एसडी कार्ड थप्न विभिन्न क्षमताका कार्ड प्रयोग गर्ने गर्दछन् ।

यदि तपाईँ सूपरस्लो मोसन ८के भिडियो रेकर्ड गर्न चाहनुहुन्छ वा तपाईँको कम्प्यूटरको सबै स्टोरेजलाई पकेटमा हाल्न चाहनुहुन्छ भने तपाईँ एसडी कार्ड चाहनुहुन्छ । अब त्यसको लागि १ टेराबाइटको एसडी कार्ड लेक्सरले सार्वजनिक गरेको छ ।

यसअघि टेराबाइटको एसडी कार्डहरु निकै वर्षदेखि आउने चर्चा भएपनि अहिलेसम्म आउन सकेको थिएन् । अझ सानडिस्कले टेराबाइट कार्ड ल्याउने बताईरहेपनि अहिलेसम्म ल्याउन सकेन् ।
अब भने लेक्सर ब्राण्डको मुख्य कम्पनी लंगसेले १ टेराबाइटको व्यवसायीक एसडी कार्ड अमेरिकामा चलिरहेको सीईएस २०१९मा सार्वजनिक गरेको छ । कम्पनीले यसको मूल्य ५०० अमेरिकी डलर अर्थात करिब ५५ हजार रुपैयाँ तोकेको छ ।

यो एसडीकार्डले ९५ एमबी प्रति सेकेण्डको रेटमा डाटा स्टोर गर्न सक्दछ । यो कार्ड रिड गर्नका लागि नै कम्तीमा ३ घण्टा लाग्दछ ।

यो कार्ड विशेषगरि ८के भिडियो खिच्नका लागि प्रयोग हुनसक्ने बताईएको छ भने यो डिएसएलआर, एचडी क्यामकर्डर, थ्रीडी क्यामरा लगायतमा प्रयोग गर्न सकिन्छ । जसले करिब ५०० घण्टाको भिडियो स्टोरज गर्न सक्छ ।

लेक्सरका वरिष्ठ मार्केटिंग म्यानेजर जोय लोपेजले भने, ‘उपभोक्ताको रुपमा उनीहरुले क्यामराको लागि निरन्तर अधिक स्टोरेज क्षमता माग गरिरहेका थिए । अब त्यसलाई उच्च कार्यक्षमता र १ टेराबाइट अप्सनले पुरा गरेको छ ।’